Pecake Popok Bayi Diolah Dadi Barang Aji
Hasan Sentot (dipublikasikan pada Kamis, 16 Januari 2020 09:24 WIB)
- Laporan
Pecak popok bayi, akeh keleleran ring banyu mili utawa selokan. Akeh warga hang magih parcaya ambi gugon tuhon, mangkane aju ati-ati kadhung mbuwang popok pecak. Timbang dibuwang ring panggonan romot, aju diobong nawi engko ana pengaruh ambi ragane bayine. Mula teka iku, aju akeh hang mbuwang ring banyu mili, utawa selokan.
“Merga ndeleng kahanan hang kaya digu, isun aju kepikiran kelendi carane ngurangi romot popok pecak iki dadi barang hang ana gunane. Aju nemu akal, popok-popok mau diolah ambi cara direndem sewengi. Serta wis ajur, kari gampang arep digawe paran bain bisa”, gedigu mula ceritane hang diomongaken Choirul Anwar, warga Tamanbaru Banyuwangi.
Teka penemu akale Choirul Anwar iki, aju didukung ambi tangga-tanggane. Kanggo ngelumpukaken popok pecak, kawitane golek ring pinggir banyu lan selokan, saiki wis akeh hang ngeteri. Lare-lare enom hang diajak megawe bareng mau, dikumpulaken ring Komunitas Peduli Limbah Taman Baru utawa KOMPLIT.
Umah cilik ring pinggir dalan iki, saben dina rame lare-lare anggota Komplit padha nggawe macem-macem kerajinan teka bahan Popok Pecak. “Saiki akeh tangga-tangga hang teka merene, sak perlu ngeteraken popok pecak mau. Sing perlu ngenteni dikumbah rijig, hang magih ana kotorane lan uyuhe bayi ya sing paran-paran. Lare-lare wis bisa mroses. Sak suwene proses mau, lare-lare padha nganggo masker lan sarung tangan, kanggo njagani anane virus teka popok bekas mau”, tambah Choirul Anwar.
Kanggo narik kawigatene wong-wong, sengaja asil kerajinan teka Popok Pecak mau dipajang ring ngarep umahe Khoirul Anwar. Akeh wong-wong liwat padha kesengsem lan sing nyana, kaya Vas, Pot, Paving Blok lan Asbak, temekaken asale teka pecake popok bayi.
“Iki pancen penemu kreatif teka Pak Choirul Anwar, mangkane kudu didukung lan dibantu kebutuhan-kebutuhan liyane kanggo mujudaken hang dikarepaken mengarep. Cara iki wis efektif ngurangi akeh romot popok pecak, merga langsung diproses ambi lare-lare. Paran maning teka kegiatan iki, uga bisa ngasilaken picis”, gedigu ucape Lurah Tamanbaru, Abdu Rahman.
Masiya buru melaku telung ulan, naming hang arep milu bareng ngolah romot popok pecak lan hang kepingin tuku asil kerajian iki akeh. Malah akeh uga hang kepingin belajar nyang KOMPLIT, kelendi carane ngolah lan gawe popok pecak dadi kerajinan.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
