Batam Kepingin Nggawe "Banyuwangi"

Antariksawan Jusuf (dipublikasikan pada Senin, 04 Oktober 2021 09:59 WIB)
- Laporan



Lahan tepat untuk iklan anda di sini.

Hubungi: skb@belambangan.com atau WA telp 0811843457


Minangka dhaerah hang adhep-adhepan langsung ambi Singapura, Batam mbutuhaken kontribusi wilayah-wilayah liya sak Indonesia, umpamane Banyuwangi hang duwe macem-macem kesenian.
   "Harapannya Ikawangi bisa bekerjasama dengan Dispar Batam dan programnya kita bentuk "Banyuwangi" di kota Batam," gedigu jare Drs. Ardiwinata, Kepala Dinas Kebudayaan dan Pariwisata Batam.
   Gedigu serang girange pak Ardiwinata marek ndeleng kesenian gandrung ring iwuhe Ikawangi Batam mengeti dina dadine hang kaping telu tanggal 3 Oktober sore. Kesenian Banyuwangi, kaya kesenian dhaerah liyane, arep dilebokaken ring acara-acara kebudayaan lan event pemerintah.
   "Harapannya jangan hanya melestarikan tetapi juga memajukan kesenian tradisional daerah masing-masing," jare pak Ardiwinata.
  Ketua Ikawangi Batam, Syamsudin asal Sumbersari, Srono ngomong gok kekarepan pemerintah Batam iki wis setel ambi rencana Ikawangi sedurunge yaiku mbangun "Kampung Using" ring Batam.
   "Kegiyatan keseniane iki sekaligus ngawiti munggah genjote Grup Gandrung Arum Wangi," jare kang Syamsudin. Sanggar Arum Wangi setemene buru bain Agustus sore ngadeg marek ulih kiriman gamelan gawenane pak Jaini teka Cungking Banyuwangi.
   Sak liyane ana Kepala Disbudpar Batam, acarane uga ditekani Direktur Eksekutif Batam Tourism Board pak Edi Sutrisno.
   Milu ngeramekaken acara kesenian iku telung wong Landa hang ana ring Batam.
   Kelawan tema "Bangkit dan Berkarya Bersama di Era Pandemi Covid 19, Agama, Sosial Budaya dan Ekonomi" Ikawangi Batam nggelar kegiyatan sosial arupa sunatan masal lan hataman Quran sak liyane acara kesenian. Kabeh acarane digelar ring sekretariat Ikawangi hang ana ring Tiban Point, Sekupang.
   Sunatan masale hang dianakaken tanggal 2 Oktober, dipiloni 36 lare umum dudu mung anake wong anggota Ikawangi, kelebu siji lare non-Muslim wis kelas 2 SMA. Dene, hataman Qurane dipiloni 10 warga Ikawangi dhewek teka marek Isya sampek tengah wengi.
   Jare Humas Ikawangi Batam, kang Yogi, merga setemene magih ana pageblug, acarane ulih ijin teka kapolsek kelawab cathetan, hang teka diwatesi mung 50 persen teka anggota hang ana. Kadhung hang liyane arep teka, wektune dibedakaken.
   Ikawangi Batam wis ngadeg sakat 2018, nduwe anggota kira-kira 150 wong. Saiki wis nduwe koordinator wilayah hang ana ring limang panggonan, yaiku 1. Sekupang 2. Batu Aji 3. Batu Ampar 4. Batam Center lan 5. Piayu.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.