Anggitane: Asri Rindang
(Minggu, 26 April 2020 05:53 WIB)

(Cerita Cendhek) KIPAS

"Mak Adon, age tah tumbasaken kipas angin niku," Sari njaluk ambi nuding kipas hang dipajang ring toko wetan dalan. 

"Umahe gedheg! Wis isis! Dienggo paran kipas angin!" saure Mak Ijah ambi nutugaken ulihe nguntingi kangkung. 

Kaya bitasahe Mak Ijah ambi putune, adol kangkung ring emperane toko pasar Belambangan. Kadhung tepak rejeki, kangkunge entek sakdurunge lohor. Saiki wis wayah lohor kangkunge magih ana limang tingkes, durung payu. Mula rejeki hing keneng diuber uga hing keneng dititeni. Wis ana tulise jare. 

"Mak adon kipas..!" Jaluke Sari ngalem. 

"Kipase apik rupa kartun tikus mickey..."

"Apikan kipas welite anang! Ana gambar kembang, kebo, wedhus, sak penjalukira!"

"Idih! Mak adon kari sing gaul! Iki kipas listrik! Dudu kaya kipase anang hang jadul!" semaure Sari mempeng.

"Ya wis kadhung Sira magih mempeng, Sira duwe picis pira?"

Sari ngelungaken picis rong puluh ewu arupa limang ewuan telu lan sewuan lima.

"Ulung sun takon nang Aji Jaini, pira regane kipas iku..." 

"Sira nyango kene bain nawi ana hang tuku kangkung!"

"Nggih Mak Adon, lope lope Mak! " semaure Sari ambi gaya artis korea. 

Mak Ijah meringis isin ndileng tingkahe putu wadone iku. 

Sakat cilik Sari milu Mak Adone. Mergane emak lan apake Sari makarya ring negara Taiwan. Wis ulih limang taun kepungkur sing tau mulih. Palingana mung ngirim picis sakcukupe kebutuhane Sari. Taping Mak Ijah nguruki Sari supaya urip perimpen. Masiya bisa bain Mak Ijah urip cukup ambi picis kiriman anak lan mantune. Iyane sing gelem nganggur. Ana bain hang dilakoni kaya saiki adol kangkung. Dudu bathi hang digoleti Mak Ijah, taping rasa dhemen ana pegaweyan ngenteni enteke dina. Rabine Mak Ijah, Anang Pi'i  semono uga. Dhemen megawe, contone nggawe kipas welit hang apik-apik. Kipase Anang Pi'i wis tau ulih penghargaan kerajinan asli Banyuwangi. 

Namung gedigu tetep bain Anang Pi'i sabar nerima. Hing tau jual mahal lan tetep asor. Saiki Anang Pi'i kerep diundang dadi narasumber enggo ngelestariaken warisan budaya Banyuwangi arupa kipas welit. 

"Iki kipas demenanira," jare Mak Ijah ambi ngelungaken kipas rupa mickey. 

"Pira regane, Mak?"

"Murah!"

"Cukup picis kula wau niku?"

"Wis, hing usah diitung, cukup ," semaure Mak Ijah. 

Regane kipas angin benere sewidak lima ewu. Hing masalah jare Mak Ijah. Hang penting  Sari cemeng kopine. 

"Ayo wis, agage mulih. Abete arepe udan, dilengen ring kulon wis katon petheng."

"Nggih Mak!" Sari semaur girang ambi nyekel kipas kelir abang kapuranta. 

"Duh senenge rasane ati, nulih kipas wes dilaksani… " suwara Mak Ijah nggending nggudha putune hang girang atine. 

"Idih, Mak Adon suwarane kari merdu kaya mbok Syaiba," jare Sari ambi mesem seneng. 

Syaiba iku arane artis gendhing Banyuwangi hang viral mergane akeh nduweni tato ring awake. Taping suwarane, haduh, nggawe ati ngelayung-layung. 

"Alakmak, Sira kadhung penjaluke wis dilaksani ana bain ulihe ngelem," saure Mak Ijah.

"Ayo wis hang gancang!"

"Nggih Mak!"

"Man Sahek, hang akas mancat becake iki."

"Kesulungan udan, mari sira! Yara kebles kabeh engko! " Mak Ijah ngingetaken tukang becak langganane ambi lungguh mapan ring becak. 

Sari milu lungguh ring iringe. Sawetara tenong wadhah kangkunge dideleh ring timplikan ngisor sikile. 

"Aja kuwatir Bik Ijah, beres!" saure Man Sahek ambi mancat becake. 

"Amening kipase iku aja sampek tebluk..."

"Yara wurung engko nganyari kipase," jare Mak Ijah ngengetaken Sari. 

Sari njawab ambi nduduhaken jempole.

Langit bumi Belambangan hang mulai ketutup mendhung ngiringi lakune becak.

Angin semilir ngiberaken rambute Sari hang digelung ringkes ring endhase. 

Akeh kendaraan hang pating ngebut gupuh. Mergane mendhunge sansaya petheng. 

"Aju kapan kipas angin iku arep Sira enggo?"

"Mantun niki Mak."

"Iki hawane kari adhem, mula kuwat Sira magih arepe nguripi kipas?"

"Kadhung adhem, kipase dadi pajangan bain hing paran-paran, Mak."

"Kan apik  diandoh ring lemari campur ambi kipas welite Anang..."

"Hus! Aja sampek Anangira ngamuk gara-gara Sira tuku kipas angin iki.."

"Sengidakaken ring kamarira!" wekase Mak Ijah. 

Mak Ijah kuwatir rabine ngamuk gara-gara kipas werna kapuranta iku. 

Sari meneng bain, yane magih meluk kipas angin iku ambi mesem-mesem.

Mak Ijah mung bisa ngelus dhadha nyawang kelakuan putu wadone. 

Mula kadhung hang diimpekaken wis kelaksan, kabeh sing ana artine, hang ana ring mata lan pikiran ya mung impenan iku thok. Embuh iku rupa barang, embuh iku rupa uwong. 

Impenane Indonesia saiki bebas covid19, mugi-mugi kelaksan dulur. Kecaruk maning ambi puwasa Ramadan taun iki.

Kutha Gandrung, 29 Maret 2020

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.