Anggitane: Hani Z. Noor
(Minggu, 03 November 2024 07:21 WIB)

(Cerita Cendhek) Uyah ambi Terasi

Uyah ambi Terasi
Anggitane: Nukhbah Fakhiroh

Arane, Baderik magih kelas papat SD, umahe nong Telemung.

Isuk-isuk, emake wis celathu. Dina Minggu, dudu wayah turu. Kudu rijig-rijig umah. Makene aja dadi wong males. Cumpu, Baderik iki tangine bedhug.

Arane tepis, diuncal ambi emake.  "Baderik, Baderik! Tangiya! Gancang tulungana Emak! sakat mau turu bain. Hing ana ulihe, mau subuh ngaji nong langgar. Kadhung mari ngaji, turu maning!” 

“Sulung tah, Mak. Arane mata wis jangget. Hing bisa diajak melek kek..” semaure Baderik.

“Eh, lare iki yuh!” Nana wis, aran tepis, muncal nyang sikile Baderik. 

Baderik mecucut, ambi setengah nangis kerana mari digebros emake. 

“Aja pati cengkal! Tukokno uyah ambi terasi, nyang warunge Wak Kah!” Abane emake ngongkon, ambi berak-berak sampek dirungokaken tanggane. 

Aran Baderik mau magih bain temungkul. Mula arane ngantuk, matane jangget. Awak wis hing gelem dijak melaku.

“Nyak, picise.” 

“Iya, Mak.”

Baderik mau, melaku ngesrek ambi mecucut kerana diamuki. Disapa kanca-kancane. Ditakoni, meneng bain. 

****

“Apuwa, Baderik? Temungkul bain.”

Sakat mau, ndeleng rupane Baderik. Wong-wong pating ngemu pitakon. Kang biyasah melayu-melayu ngejer layangan dadi meneng, hing semaur.

*** 

Sakwise gadug, tukuke Wak Kah. Kerana ditakoni wong-wong. Aju Baderik Iki lali. 

“Isun arep tuku paran?”

Jarene Wak Kah, "Baderik, Sira iku apuwa mbesengut, matane ngeluh. Arep tuku paran?”

Baderik mbatin, isun arep tuku paran yuh? Ambi kukur-kukur endhas. 

“Using tah Wak, Emak mau nguweni Isun picis. Tapi Isun lali, arep tuku paran. Pungkasane Emak mau celathu, merga Isun turu. Tapi, Isun nak tuku paran yuh?”

“Takona sulung, sing paran-paran. Dianteni bain, tukuke magih bukak. Aja kuwatir.”

“Emong, ngkotah tambah diamuki. Isun males, ngerungokaken Emak celathu. Nong dalan sampek ditakoni Man Patah, Kang Usik, wong-wong.”

“Ya wis, tuku gula ambi kemiri bain. Iki picise.”

Hang aran Wak Kah, arane hang dodol ya terima bain. Salah bener, urusan hang tuku. Hang penting, ana picise, hing ulih utang.

***

Baderik mulih, hing kathik maning mbesengut, atine lega. Mulih, melebu umah aju nyang Pawon.

“Assalamualaikum Mak, nyak gula ambi kemirine.”

“Astaghfirullah, Baderik! Apuwa sing ngerungokena? Kuping tah canthelane panci? Hing ana arane Sambel Tempong ketemu kemiri!"

Hang aran sapu kerik, mara nyang sikile Baderik. Baderik nangis, dikongkon melayu balik nyang tukuke Wak Kah.

Maune, apake arep mangkat nyang sawah. Arep sarapan, taping Baderik salah tuku uyah.

“Sepurane, Emak Apak.”

Baderik ambi nangis njuwut sandhal, gancang melayu liwat cendhela merga diamuki maning ambi emake. 

Wong-wong tambah ketheng, kerana hang aran sandhal hing dienggo, dicangking bain. Ambi nggawa gula lan kemiri. Aju mbalik nang tukuke Wak Kah, ambi mesesegen. 

Merga Baderik salah tuku uyah ambi terasi hang maune arep nyambel tempong, tapi sikile Baderik hang keneng tempong ambi tepis lan sapu kerik. 

****

Dadi lare aja kumat-kumatan kadhung dikongkon wong tuwek. Kadhung emake ngongkon, gancang mangkat. Hing usah melungker maning dhuwur kasur. Aju dikongkon atine bangkel. Hang aran rupane mbesengut, ditakoni kanca-kancane dadi lali sekabehane. 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.