Cerita Ring Walike Kubung: Ontrang-Ontrang Langit Payaman
Antariksawan Jusuf (dipublikasikan pada Sabtu, 29 November 2025 06:50 WIB)
- Esai
Cerita Ring Walike Kubung: Ontrang-Ontrang Langit Payaman
Sakat pucuk ulan Juli sampek seperene, novel Using Ontrang-Ontrang Langit Payaman (OOLP) uwis melebu cetakan kaping papat. Kira-kira wis satus eksemplar lebih hang payu.
OOLP setemene magih ana gandhengane ambi novel sedurunge yaiku Pereng Puthuk Giri (PPG). Malah karakter tokohe ya terusane teka PPG.
Ngenengi judhule, kawitane isun mbukak musawarah ambi Kang Aang minangka tukang sunting hang uga nggawe samake, kelendi carane bisa diterima ambi pasar.
Pungkasane kepilih hang saiki wis diwaca uwong akeh. Sak liyane akeh hang payu, uga ana hang dikirim nyang dosen UNEJ, DR. Ahmad Taufik, Dosen Universitas Leiden Belanda, Prof.Dr. Ben Arps, Balai Bahasa Jawa Timur, Yayasan Rancage Bandung lan akeh hang tuku liwat jero kawat (daring) kaya dene dulur-dulur Tangerang Selatan, Semarang, Gersik, Samarinda, Denpasar Bali, kanca-kanca DKB, karyawan Disbudpar, para guru Banyuwangi lan uga ana para wali murid hang kepingin sinau basa Using liwat novel OOLP iku.
Kuwasane Pengeran, tanggal 15 Oktober kepungkur novel OOLP, ulih Anugerah Sutasoma. Yaiku penghargaan kanggo karya sastra daerah terbaik taun 2025 teka Balai Bahasa Jawa Timur (BBJT). Kala semono acarane dianakaken ring aula BBJT Sukolilo Surabaya.
Mung bain, ring ceritane ana hang nyeliwah salah ketik. Pantese bain nalika ngetik ambi kesirep-sirep ring ngarepe laptop. Mesthine Gestapu ketulis Gestok. Mesthine Romlah dadi Rohilah. Ana maning "marek-marekaken" ketulis "mareg-maregaken". Kanggo kesalahan ketik iku, isun njaluk sepurane.
Muga bain paran hang wis sun lakoni kanggo ngumbulaken karya sastera dhaerah Iki ana hang mbuntuti. Saingga, akeh kanca-kanca hang gelem nulis lan nguri-uri basa Using hang dadi identitas masarakat Banyuwangi.
Muga Pengeran ngijabah, ahir taun 2025 Iki, isun arep nerbitaken esai "MENELISIK JEJAK SASTRA USING". Buku Iki keneng dienggo sinaune dulur-dulur guru basa Using, minangka kanggo nambah-nambahi pengetahuan ngenengi masalah karya sastra Using.
Kadhung magih ana karine umur, insyaalloh taun 2026 wis sun cepakaken siji maning kumpulan cerita cendhek "Iline Banyu" isine sangang cerita. Antarane yaiku Gendhing Kembang Cicir hang uwis diunggah belambangan. com saben dina Minggu sampek emeh rong ulan suwene.
Engkisuk iki OOLP dibeliyaki ring Iwuh Gedhe Sastera Using. Hang mbedhah dosen hang uga pemerhati budaya Muttafaqur Rohmah lan pembandhinge kang Hasan Basri hang dadi ketua DKB. Wong loro iku diarepaken bisa mbeliyaki paran hang ana ring OOLP.
Muga-muga kerenteg iki bisa nggawe kahanan sastera Using saya rumang.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
