Duta Seni Banyuwangi Juwara ring Malang

Moh. Syaiful (dipublikasikan pada Selasa, 21 Juni 2022 10:25 WIB)
- Laporan



Duta Seni Banyuwangi hang tarung ana ring kegiyatan Pekan Cipta Seni (PCS) Tahun 2022 hang manggon ana ring Taman Krida Malang menang juwara siji kabeh lan ulih tambahan penghargaan penata tari lan penata musik.

Ring jenjang umur 7-12 Taun PCS Banyuwangi Cabang Tari Tradisi “Kempis” ulih juwara 1 lan ulih Penata Tari Terbaik hang aran Ainul Yaqin. Kempis Tarian lare cilik hang nyeritakaken megiyete lare cilik memengan golet iwak ya golet kodhok iki kelebu tarian hang pantes temenan kadhung juwara siji, paran maning disokong ambi penarine hang kuwat lan sagah anggone njuget ana ring panggung utama Taman Krida Budaya Jawa Timur hang ana ring Malang.

Lahan tepat untuk iklan anda di sini.

Hubungi: [email protected] atau WA telp 0811843457


Sakliyane Jenjang Usia 7-12 Taun kakang lan emboke hang ana ring Jenjang 13-15 Taun uga mbebet kejuwaran event lomba lan pestival bergengsi sak Jawa Timur iki. Kelawan nggawa judhul “Sanyang Titis” PCS Banyuwangi Cabang Tari Tradisi oleh juwara Siji magih ditambah ambi penghargaan Penata Tari Terbaik hang nggawa aran Estu Candra Anggraini. Estu hang kelairan Tapanrejo Muncar 11 Mei 2001 magih kuliyah ana ring Unesa jurusan Sendra Tasik Surabaya iki nyata-nyata bisa  nggawa bukti masiya magih durung lulus kuliah.

“Sanyang Titis” hang nyeritakaken semangate lare-lare nom-noman hang ilang merga ana pageblug, aju ulih semangat teka salah sijine agul-agule Belambangan hang aran Sayu Probo. Sayu Probo hang urip ring jaman perjuwangan kerajaan Belambangan iki nitis  nyang lare-lare nom-noman mauka. “Sanyang Titis” uga ulih penghargaan Penata Musik Terbaik hang digarap Alfian Kalfitulloh S.Sn guru teka SMPN 1 Singojuruh.

Mimik Suhartini, S.Pd hang dadi koordinator Cabang Tari Tradisi Jenjang Usia 13-15 Taun ngucap sukur gedhe nyang Pengeran merga bisa nggawa penghargaan kanggo njejegaken maning kesenian Banyuwangi utamane seni tradisi ring wilayah Jawa Timur. Masiya mung rong minggu nganakaken pemusatan dikawiti 4 – 18 Juni 2022 naming nyatane lare-lare iki bisa main apik lan mulih nggawa akeh penghargaan. Iki merga uga cawe-cawene MGMP Seni Budaya  SMP, MKKS SMP lan Dinas Pendidikan Kabupaten Banyuwangi hang wis temenanan anggone nyiapaken sekabehane, gediku keterangane guru senior SMPN 1 Singojuruh iki.

Iki buru dina kawitan lomba lan pestival merga kesuk magih ana cabang lomba kaya Musik tradhisi, Paduan Suara, Cipta Baca puisi, lan Teater Tradisi. Muga-muga ring cabang liya uga bisa nggawa mulih piala lan kejuaraan maning, gediku jare Hariyanto, S.Pd salah sijine Pembina teka MKKS SMP Negeri Kabupaten Banyuwangi. Lare-lare iki pancen lare-lare hang paling sagah merga dipilih temenanan ana ring seleksi sak kabupaten sakdurunge pemusatan latihan.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : Seni

Editor: Antariksawan Jusuf