Gandrung Caruk Banyuwangi-Lombok

Moh. Syaiful (dipublikasikan pada Kamis, 25 November 2021 07:16 WIB)
- Laporan



Padu-paduan soal Gandrung Lombok hang arane emeh padha ambi Gandrung Banyuwangi bengi iku wis kejawab kelawan digelare Gandrung Lombok hang digawa misi kesenian Dinas Pariwisata Mataram ana ring Fish Market Kampung Mandar Banyuwangi. Masiya ana ring acara Muhibah Budaya hang nggawa aran Harmony Fish Market iki sing ana padu-paduan bab gandrung, naming teka kene katon kadhung saktemene Gandrung Lombok iki pancen sing padha ambi Gandrung Banyuwangi. Kadhung sabane ana poto hang beredar ana ring penanggalan hang nyatane poto Gandrung Banyuwangi taping nganggo tulisan Gandrung Lombok mestine iku kesalahan cetak utawa salah ana ring penulisan hang bagian editing utawa bagian pracetak.

Bengi iku sakmarine Isak manggon ana ring Kampung Mandar utawane Pelengsengan Banyuwangi, 23 Nopember 2021, rong misi kesenian yaiku kesenian teka Kota Mataram lan Kabupaten Banyuwangi pada gelar budaya kanggo ngeraketan seduluran antarane Dinas Pariwisata Kota Lombok ambi Dinas Kebudayaan dan Pariwisata Banyuwangi.

Harun, salah sijine tim anggota misi kesenian Harmony Fish Market teka kutha Mataram nyatakaken kadhung iyane dhemen bisa teka ana ring Banyuwangi sakperlu promosi wisata uga sakperlu sesambungan silaturohim ambi Dinas Kebudayaan dan Pariwisata Kabupaten Banyuwangi. Iyane nyadhari kadhung tim hang digawa iki pancen sak majade bain merga magih ana pandemi hang uga dadi pertimbangane teka nyang Kabupaten Banyuwangi.

Lahan tepat untuk iklan anda di sini.

Hubungi: [email protected] atau WA telp 0811843457


M. Yanuar Bramuda Kepala Dinas Kebudayaan dan Pariwisata Banyuwangi ana ring sambutane nduduhaken lakune Fish Market Kampung Mandar hang kawitane panggonan iku panggonan hang nyukeri (kumuh) utawa panggonan tumpukan deket hang gawe wong mengkirig suker kapan teka merana. Sakteruse Pemda Banyuwangi liwat Dinas PU, Dinas Pariwisata, Dinas Perikanan, Dinas Lingkungan Hidup uga Dinas Kebudayaan dan Pariwisata Banyuwangi ngereka daya ndadekaken panggonan iki bisa apik sampek kaya gediki. Sambutane Kepala Dinas Kebudayaan dan Pariwisata iki dikeploki anter ambi rombongan Dinas Pariwisata Mataram hang dipimpin Sekertaris Dinas Kebudayaan dan Pariwisata Mataram Ir. Umara Sri Rachmawati 

Gelar kesenian bengi iku bisa nggawa tontonan sing mong para tamu lan undangan teka kutha Mataram bain naming uga masarakat Kampung Mandar hang katone ngakak gemuyu wayahe ndeleng Macaan Pacul Gowang hang nggawa lakon Game On-line iki.

Sakteruse Wong Mataram iki nampilaken Mataram seni Barong Lombok, Tarian Kembang Setanggi, Peragaan Busana Adat Suku Sasak, lan Gandrung Lombok. Sing kalah ambi Mataram Banyuwangi ngetokaken kesenian Jejer Gandrung, Gandrung Paju, Jazz Patrol Kawitan, lan Macaan Pacul Gowang Spensaba Milenial SMPN 1 Banyuwangi hang sakdurunge ulih Juara 3 lan ulih maning penghargaan Naskah terbaik ring Revitalisasi Sastra Lisan Macaan Pacul Gowang 2021.

Penonton surak ring wayahe ana paju gandrung teka gandrung Lombok iki. Nyatane pemaju-pemaju Banyuwangi diakoni kesit-kesit lan kelit sampek-sampek gandrung Lombok iki kedandapan ngadepi pemajune. Iki uga diakoni ambi Harun koordinator tim kesenian Mataram ring Harmony Fish Market bengi iku.

(Link Video ana ring kene:  https://youtu.be/dpjMah1LVaU)

 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : Kabar Anyar

Editor: Antariksawan Jusuf