Gelar Rebo Pungkasan Ring Kedung Derus, Kabat

Andi Sep Kurniawan (dipublikasikan pada Sabtu, 09 Oktober 2021 10:17 WIB)
- Laporan



Lahan tepat untuk iklan anda di sini.

Hubungi: skb@belambangan.com atau WA telp 0811843457


Rebo Pungkasan utawa Rebo Wekasan tiba ring rebo pungkasan ulan Sapar ring itungan tanggalan Jawa. Rebo pungkasan yaiku salah siji tradhisi utawa adat masarakat pesisiran/nelayan hang saben taun dianakaken. Taun iki Rebo Pungkasan dianakaken ring tanggal 6 oktober 2021 ring Pesisir Kedung Derus, Pondoknongko, Kabat.

Mula dhaerah iki saben taune mesthi ngelakoni tradhisi Saparan hang uga diceluki petik laut. Setemene kaya taun sedurunge, taun iki magih ana ring mangsa pageblug. Naming arane tradhisi ya kudu tetep melaku, cathetane uwong-uwong hang teka kudu nganggo masker lan ngugemi protokoler kesehatan.

"Masarakat hang melebu ring kecamatan ngurusi administrasi kudu scan barcode aplikasi PeduliLindungi. Ana ring wektu parek iki, sarat scan barcode wis disiyapaken kecamatan kanggo nyuksesaken vaksinasi. Taun iki, Isun wis melebu ring taun ke lima nguri-uri tradhisi Rebo Pungkasan ring pesisir Kedung Derus Pondoknongko," jare Susanto Wibowo Camat Kabat.

Miturut Kepala Desa Pondoknongko, "Rebo Pungkasan yaiku tradhisi masarakat nelayan hang saben taun dianakaken. Tradhisi kudu dijaga makene sing luntur utawa ilang. Rebo Pungkasan taun iki dipilih tema "Nguri-uri adat makene tetep lestari". Terima hang gedhi kanggo panitia, werangkat desa, pokmaswas Deling Seganten, pokdarwis Maju Bersama hang wis nyepakaken kegiyatan iki dadi sukses. Uga masarakat hang wis padha teka."

Tradhisi Rebo Wekasan yaiku tradhisi hang dipercaya masarakat kanggo tulak balak. Sakliyane iku dienggo ngucapaken rasa sukur ring Pengeran wis diwani rejeki lan kesehatan. Saben taun dianakaken makene sing mangan korban, dadi adat iki mauka kudu dilestarikaken.

Rebo pungkasan ring Pesisir Kedung Derus Desa Pondoknongko dikawiti teka nyabrang nganggo perahu nong pesisire. Ana selametan ancak, teka RT, RW lan masarakat. Ana kuliner Jenang Sapar gratis kanggo wisatawan hang teka, diwadhahi takir lan diethuk, tujuwane dienggo ngurangi sampah plastik.

Sakliyane iku, uga ana pameran UMKM hang digelar ring kegiyatan Rebo Pungkasan. Pemerintah Desa Pondoknongko ngajak pelaku UMKM kanggo ngembangaken usahane. UMKM hang ana kayata jajanan, kuliner, ulih-ulih, kaos produksi masarakat lan liya-liyane.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor