Anggitane: Rissa Churria
(Minggu, 30 Januari 2022 09:18 WIB)

(Gurit Using) Wong Jaranan, Seblang lan Penari

WONG-WONG JARANAN
(Rissa & Cak Nur)

Serngene hang panas
Sing nggawe ati rantas
Padha nonton jaranan
melaku kari akas
Ambune dupa menyan sing bakal ngebas

Jaranan
Jejogedan 
nunggang kulit sapi wujud jaran
Pecut hang ring tangan
kemeter 
muter-muter sing karuwan

Barang alus padha teka
milu celuke welek dupa
Melebu sukma
Ngubah-ubahena raga
Mata abang kari mawa

Jaranan
Mangan wawa sing kerasa
Mangan beling sing iling
Mangan paku sing nggugu
Rasa wis mati
hang dilakoni sing ngerti

Otote kaku
Matane abang nggolet laku
Kupinge rungu suitan
Suit suit suit
Nguber anter kenceng 
Nabrak-nabrak 
Nerjang -terjang

Jaranan
Dhukun teka kuping disemprong
Tembluk lemes awak digotong
Ngarekaken rasa lara sing bisa ngomong

Budaya
Tetep dadi jiwa hang dirumat
Sak ebeke welas hang sing tau sambat
Ring larik lontar penguripan
tanah Jawa hang sing tau asat
Telatah Belambangan arane wis jenggirat

Bekasi - Banyuwangi, 27.12.2021

PENARI
(Rissa & Cak Nur)

Separuh ngarep-ngarep hang lair
Kepingine ati ngukir cerita
Ngelus-elus kabeh rasa amuk
bencah bungkrah

Ubahe tarian asmara
Setugel cerita 
kegurit saben lakon gerigis
Nyapa bumi manis wajah ujar-ujar
 
Iyane iku gandrung Banyuwangi
Tanjeg sikile weluri lelana 
Nekakena sak lembar cerita
Ngelukis gambar-gambar
Dadiya kadhang samar

Sorot matane ebek makna
Landhep nggetak mala 
hang sing kewaca mata
Mata adate

Kala-kala ngenes nancep dhadha
Ngerongrong sungkawa
Kosong sukma
Eseme nggawe kembang padha rontok
Nampik macem-macem nelangsa
Lumer sakjerone tarian

Bogor - Banyuwangi, 18.12.2021

SEBLANG OLEHSARI
(Rissa & Cak Nur)

Iyane 
Seblang Olehsari
Perawan cilik
hang dilamar ruwatan adat
Budaya using hang wis jangget ring masarakat
Bersih desa 
teka mala
Serana jodho asmara
Rasa sukur ring Hang Kuwasa

Kegol bokong hang sing dingerteni
Keli mili
milu tabuhan tembang lan gendhing 
sing ana hang ngajari
Mubeng-mubeng  jejogedan milu lakune angin hang wangi

Tangan sikil lan awake
kompak jejogedan sing weruh dalan
Derijine lincah nggawe tentreme ati
Mata merem ketutup omprog kembang
Perawan Seblang 
jejogedan milu mutere bumi
Tanjeg sikile mata penguripan
Kaya Dewi Sri hang nggawa berkahe kahanan

Ana hawa angker ring selendhang kain hang nutupi awak
Suwuk disemprong
campur dupa kemebul
ngancani ruwatan
Serngenge surup 
ulane nyungup
Seblang gandrunge kudu tutup

Bekasi - Banyuwangi, 13.07.2021

TANAH PENARI

(Rissa Churria)

ini adalah tanah bertuah

dari renjis kisah prabu menak

babaran ksatria damar wulan

dan suratan takdir Sidapeksa

purna oleh napsu pikir

pada Sritanjung

kekasihnya

tanah ini tanak oleh ritual

dan segala budaya yang dipertuan

mengolah segala nestapa menjadi cinta

menyatukan seribu tetabuhan merupa gending

dalam madah yang kental oleh ribu adat-istiadat

menjadi perjamuan olah rasa yang agung

tanah penari jejek kaki di bumi Using

meninggalkan lenggok gemulai

bukan sekadar bayangan

wangi aroma dupa

kembang setaman

iki dudu petetan

hang dideleng nang jero kaca

dadi pandengan sapa-sapa hang nyana

warisan hang terus kudu dijaga

kangge anak turun kang keduga

eeeeeeeee angin

kang liwat ring kono

milu takon hang jeru

ngerumat awake dhewek

apa anane nang tanah penari

bekasi, 15.05.2021

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.