Hasan Basri Kedhapuk Ketua DKB sampek 2023

Moh. Syaiful (dipublikasikan pada Jumat, 25 September 2020 06:56 WIB)
- Laporan

Sing suwe anggone Hasan Basri dadi Plt. (Pelaksanan Tugas) Ketua Dewan Kesenian Blambangan (DKB) Banyuwangi. Saklengsere Dr. Taufik Hidayat teka pelungguhan Ketua DKB merga mengundurkan diri serta dadi Ketua Timses Pemilihan Bupati Banyuwangi ring tanggal 4 Sepetember 2020, Drs. Hasan Basri hang dadi Wakil Ketua 1 lungguh dadi ketua sakwetara ngganteni Dr. Taufik.

Tuntutane anggotane agageya ngelakoni Musyawarah Daerah Luar Biasa (Musdalub) dienggo netepaken Plt Ketua dadi Ketua DKB. Bener nyatane paca ring tanggal 24 September dina Kemis manggon ana ring Pelinggihan Kantor Dinas Kebudayaan Pariwisata digelar Musdalub hang ditekani wong hang akehe 64 teka anggota DKB dhewek lan perwakilan seniman budayawan sak-Banyuwangi.

Pemerintah Kabupaten Banyuwangi hang diwakili ambi Kepala Dinas Kebudayaan dan Pariwisata Banyuwangi MY Bramuda nyatakaken kadhung DKB perlu anane kanggo pemerintah, dadi partner hang bisa bersinergi ngurusi kesenian lan kebudayaan hang ana ring Banyuwangi. Mula iku pemerintah wajib perlu ngiring lakune program-program DKB, gedigu sambutane Bramuda ana ring pidhato pembukaan Musdalub iku.

Aguk Nurwahyudi hang dadi wakil sekertaris DKB nerangaken dhung penetapan Hasan Basri dadi Ketua iki dasar hukume ana ring Tatib Musdalub tahun 2020 iki. Masiya tahwis ring Anggaran Dasar lan Anggaran Rumah Tanggane DKB sing ana ketentuan kadhung Plt. (Pelaksana Tugas) Ketua otomatis dadi ketua, naming ana ring Tatib iku bisa diatur. Lan pungkase kabeh aklamasi bisa nerima keputusan Tatib Musdalub iku.

Sakteruse Ketua DKB asil Musdalub iki aju nggawe tim formatur hang akehe wong lima yaiku, Hasan Basri (Ketua DKB), Sumitro Hadi (sesepuh), Nanik Asiani (DKB lama), Choliqul Ridho (pemerintah) lan Punjul Ismu Wardoyo (Dewan Pengarah) mbentuk pengurus harian uga struktur liyane. Aguk nerusaken keterangan kadhung Tim Formatur diuweni wektu dawane telung dina kanggo nyusun pengurus anyar ring taun iki sampek taun 2023.

Punjul Ismu Wardoyo hang dadi anggota Dewan Pengarah DKB uga bisa lega merga kabeh keputusan iki bisa diterima peserta Musdalub 2020. Punjul hang uga seniman teka Banyuwangi kidulan iki nambahi keterangan kadhung iyane duwe keyakinan kadhung DKB hang digawa Hasan Basri iki bisa gancang megawe lan gancang dandan-dandan paran bain hang magih durung bener ana ring program-programe DKB.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.