Ikawangi Pusat Bibit Perkawit Ikawangi
Antariksawan Jusuf (dipublikasikan pada Senin, 20 September 2021 08:10 WIB)
- Laporan
"Kelendi-kelendiya, Ikawangi iki bibit perkawit ngadege ya hang ana ring Jakarta. Umpamane hing ana hang ngawiti nong kene, nawi hing ana aran Ikawangi," Ketua Umum Ikatan Keluarga Banyuwangi (Ikawangi) Pusat Dr. Bambang Sugiyono M. Si. ring pidhatone tepak perayaan mengeti dina dadine Ikawangi hang kaping 49 dina Sabtu 18 September sore.
Setemene tanggal dina dadine iku 16 September taping merga tanggal iku magih dina megawe diundur nyang tanggal 18.
Tepak 16 September 1972, ana kumpulane wong Banyuwangi hang aran Pewangi Jaya (Paguyuban Warga Banyuwangi Jakarta Raya), dibantu ring Bupati jaman semono pak Joko Supaat Slamet, nganakaken pentas seni kanggo wong Banyuwangi ring Taman Ismail Marzuki. Sakjege iku tanggale dienggo dina kelairane Ikawangi.
"Umur semono iku mesthine dudu lare nom-noman maning, mesthine wis penter mbeliyaki endi hang apik endi hang elek. Endi hang 'bijak' endi hang sing," jare wong Genteng hang tau dadi walikota Jakarta Utara iki.
"Mulai saiki, aran sebutan Ikawangi Pusat Jakarta Hun dadekaken Ikawangi Pusat bain makene hing ana salah kaprah maning endi Ikawangi Pusat Jakarta endi Ikawangi Jakarta Pusat," jare kang Bambang. Ikawangi Jakarta Pusat iku aran salah siji korwil hang ana ring ngingsor payunge Ikawangi Pusat, merga panggonane milu wilayah Jakarta Pusat. "Apuwa Pusat? Merga asale mula teka kene."
Ring upacara sore iku, uga milu nekani Pak Noer Hafandi, hang dadi salah siji wong hang milu ngedegaken Pewangi Jaya lan uga sekretarise hang kawitan.
"Saiki wis lawase 49 taun, wis ngelantar nong Jabodetabek, malah sak nusantara lan sak donya," jare Kang Bambang. Uga ana kekarepan, ana pengurus (wakil) hang ngurusi wilayah nusantara lan negara manca.
Sak liyane upacara, ring iwuh iku Ikawangi uga ngelungaken bantuwan kanggo lare atim hang akehe 49, taping merga magih ana pageblug, diwakili 4 lare atim wadon lan 9 lare atim lanang. Hang uga ulih bantuwan, yaiku pesantren Darussalam Cendikia ring Kelapa Nunggal Bogor hang dikelola ring wong Banyuwangi yaiku Gus Ali Syafaat.
Uga ana pengumuman pemenang Lomba Baca Puisi/Basanan hang dianakaken ring Ikawangi. Pemenang 1 yaiku Ridzkiya KS, hang nomer 2 R. Hartono lan nomer 3 Joko P. Susanto.
Ketepakan ana acara ring Jakarta, Ketua Ikawangi Balikpapan AKBP Suyitno uga milu merdhayoh.
"Kene iki perlu niru Ikawangi Pusat. Programe akeh gunane kanggo masarakat. Bisa dadi inspirasi kanggo dhaerah liyane," jare pak Suyitno.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
