Ikawangi Sumatra Grup Adol Sayur ring CFD Pekanbaru

Hani Z. Noor (dipublikasikan pada Senin, 08 Agustus 2022 07:47 WIB)
- Laporan



Ikawangi Sumatra Grup (ISG) milu ring kegiyatan  Pekan Pangan Madani, sore dina Minggu tanggal 7 Agustus 2022. Kegiyatan iki minangka salah siji cara kanggo nyuksesaken program Ikawangi Sumatra Grup ring taun 2022 yaiku mberdayakaken ekonomi lan wirausaha kelawan nggandheng Pokalanso Farm ring Sumatra Barat hang duwe kebon werane ana nawi 60 hektar ring dhaerah Tanah Datar, duwene Kang Sugeng Pristiwa Hadiyanto. Kang Sugeng iki anggota Ikawangi Sumatra Barat, pangsiyunan ASN aseli Penataban Banyuwangi lan uga kerjasama ambi Dinas Ketahanan Pangan Kota Pekanbaru, Riau, jare Seketaris ISG Herry Susanto hang milu ubreg sakat buru teka gagasan sampek dadi kasir.

Masiya ring kawitan arep kerjasama nekakaken sayuran teka Pokalanso Farm nyang Pekanbaru iki rada sara lan akeh alangane, ahire Ikawangi bisa nembusi lan mulai ngelebokaken sayuran asil tanine Pokalanso Farm nyang pasar induk Pekanbaru Riau. 

Dene maceme sayuran hang ditekakaken merana ya maneka rupa, kayata brokoli, bungkul, sawen pait, sawenvmanis, sawen putih, kenthang, wortel, lobok litik, lobok ijo, lobok abang, lobok setan, manisah, buncis lan liya-liyane.

Lahan tepat untuk iklan anda di sini.

Hubungi: [email protected] atau WA telp 0811843457


Pirangane suwe dilakoni ngirim barang iki cumpune akeh pisan masalah hang ditemoni. Sampek ahire ana pengurus Ikawangi, Mbok Aulia hang mbantu nembusi nyang Dinas Ketahanan Pangan ring Pekanbaru Riau.

Kegiyatan hang dilaksanakaken iki minangka upaya hang dilakoni kanggo nguwataken ketahanan pangan kanggone masarakat lan hususe warga Ikawangi kelawan nyedhiyakaken maneka rupa sayuran rega petani. Dene bathine dodolan iki bisa dirasakaken kanggo para welija lan uga bisa nambah isine kas ISG.

Kepala Dinas Ketahanan Pangan Alek Kurniawan nepaki rapat ambi ISG lan Pokalanso Farm nampa kerjasama iki kelawan girang merga anane paguyuban kaya Ikawangi iki wis gelem milu megiyet mbantu kegiyatan ketahanan pangan pemerintah dhaerah.

Teka ring rapat iku disepakati gok kanggo ngawiti kegiyatan kerjasama iki mbukak pasar sayur ring acara Car Free Day dina minggu tanggal 7 Agustus sore iku.

Dinas Ketahanan Pangan uga ndhukung kelawan nyedhiyani Cold Storage kanggo nyimpen sayuran hang sing patiya tahan suwi supaya tetep seger kanggone diedol engkisuke.

Pengarepane, Ikawangi bisa ajeg saben dina ngirim asil kebon arupa sayuran teka Pokalanso Farm iki, lan saiki magih dijajagi pisan nawi bisa nekakaken woh-wohan.

Ikawangi Sumatra Grup (ISG) hang diketuwai Kang Muhammad Nurhidayat iki wilayahe nyerambah sangang propinsi lan 140 kabupaten teka Aceh sampek Lampung iki anggotane ana kira-kira 125ewu.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Antariksawan Jusuf