Ikawangi Sumatra Grup Jaja Haji lan Umroh

Hani Z. Noor (dipublikasikan pada Jumat, 12 Agustus 2022 10:17 WIB)
- Laporan



Salah siji upaya hang dilakoni Ikawangi Sumatra Grup (ISG) mujudaken lan nyuksesaken programe ring taun 2022 yaiku seliyane njejegaken ekonomi lan wirausaha, uga ningkataken kegiyatan keagamaan.

Kabid agama lan rohani Ikawangi Sumatra Grup Pekanbaru Riau yaiku kang H.Ponidi, ASN hang aktip ring MUI Kab. Kampar iki seperene wis ajeg nganakaken kegiyatan wirid saben tengah ulan. Seliyane silaturahmi lan wiridan bareng, uga ana tausiyah kelawan nekakaken ustadz ring pertemuan iku.

Kanggo ningkataken kegiyatan ekonomi lan keagamaan iki, aju ana penemu kelendi kadhung ISG bidang agama lan rohani iki bisa mbantu warga Ikawangi hang arep ngelaksanakaken rukun Islam hang kaping lima yaiku Menyang Haji lan uga Umroh. Mangkat teka penemu iku, aju pengurus ISG ngenam kerjasama ambi AET Penjuru Wisata Negeri minangka perusahaan penyelenggara umroh, haji plus lan visa provider, gedigu warta hang ditampa teka kang Herry Susanto, seketaris ISG.

Lahan tepat untuk iklan anda di sini.

Hubungi: [email protected] atau WA telp 0811843457


Ketua ISG kang Nurhidayat, bendahara kang Ade lan sekjen kang Herry Susanto nemoni kepala cabang AET ring Pekanbaru. Ring pertemuan iku digesahaken kelendi skema kerjasama arep dilaksanakaken. Teka ring pertemuan iku aju digawe surat perjanjian kerjasama (MOU) ring ulan Juli hang salah sijine arupa penunjukan ISG minangka perwakilan AET ring Pekanbaru lan propinsi liyane hang ana ring wilayahe ISG.
Sakuwise iku para pengurus aju nemtokaken panggon kantor perwakilan AET ring sangang propinsi wilayahe ISG. 

Perwakilan AET ring kutha Pekanbaru Barat ana ring umahe Sekjen ISG kang Herry Susanto ring jl. Melati lan Pekanbaru Timur ana ring umahe Bendahara Umum kang Ade ring jl. Pesantren No. 78 Tenayan Raya Kota Pekanbaru, hang uga dadi kantor sekretariat Ikawangi. 

Seperene kantor-kantor iku wis mulai melaku, ngelola para warga ISG hang arep menyang umroh utawa haji plus.

Kanggo jamaah umroh utawa haji plus hang wis ndaptar wis langsung bisa milu bimbingan hang dianakaken saben dina Sabtu.

Pengarepane ulan ngarep kabeh Ikawangi ring propinsi mulai Banda Aceh sampek Riau wis bisa kerjasama lan mbukak kantor perwakilane, saingga warga Ikawangi hang wis duwe niyat umroh utawa niyat menyang haji gancang bisa dipasilitasi dan ndaptar nyang AET liwat kantor perwakilan AET hang dikelola Ikawangi Sumatra Grup ring saben-saben propinsi iki.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Antariksawan Jusuf