Jujugan Kelencerane Menteri Pariwisata Dhongkol Arief Yahya

Antariksawan Jusuf (dipublikasikan pada Selasa, 05 Oktober 2021 10:39 WIB)
- Laporan



Lahan tepat untuk iklan anda di sini.

Hubungi: skb@belambangan.com atau WA telp 0811843457


Katone uripe menteri pariwisata dhongkol Arief Yahya iki hing adoh teka donya kelenceran. Dina minggu tanggal 3 Oktober sore, panggonan jujugan kelenceran duwene iyane, Puri Bambu, hang ana ring Bojongkoneng, Cikutra Bandung, dibukak maning.
   Jare pengelolane, Nico Ardian, setemene panggonan "nongkrong" iki wis ngawiti bukak sakat 2019 taping melakune rada keserimped merga ana pageblug. Sak suwene ana pandemi iki panggonane ditutup sampek kira-kira rong ulanan kepungkur, dienggo wong-wong wadon senam bareng-bareng.
   Tanggal 3 Oktober sore, ditekakaken band, tari Jaipong, Kuntulan lan Barong Banyuwangi. Barong lan grup Kuntulane iki duwene Ikawangi Bandung hang ring kepengurusane, kang Arief Yahya iki dadi pembinane, merga sakat kuliyahe bengen ring ITB uripe ana ring Bandung. Ana nawi wong 300 hang teka ndeleng acarane ring kana.
   Puri Bambu dhewek teka arane nduduhaken gok jujugan ngelencer iki ana hubungane ambi jajang. Ring panggonan hang werane rong hektaran iki ana bangunan hang digawe teka jajang lan uga minangka panggonan workshop kerajinan kriya teka jajang.
   Jare kang Nico, Puri Bambu mula dudu hotel masiya mengarepe kepingin ana pelataran kemah (camping ground). Saiki mung ana umah jajang iku, umah endhog (bangunan hang modhele kaya endhog, hang konstruksine digawe ambi tim-e kang Nico lan wis ana ring 10 panggon jujugan (destinasi) Bali Baru) hang bengen tau dadi programe kang Arief tepak dadi menteri pariwisata.
   Minangka panggonan eduwisata, Puri Bambu saiki arep digawe panggonan ngumpul sanggar-sanggar seni kanggo latihan, kanggo munggah genjot lan uga panggonan kanggo pelatihan kriya nggawe barang-barang teka jajang.
   Ana pisan tim teka Universitas Padjajaran Bandung hang arep nggawe bareng umah kaca (greenhouse) ring pelatarane Puri Bambu kono kanggo mbibit kembang.
   Panggonan eduwisata (wisata hang ngemu pendidikan) gedigi kanggone kang Arief dudu hang kawitan. Sedurunge lare Panderejo iki ya wis nggawe workshop "de Wina" laminasi jajang lan produk jajang ring Walini, Cikalong Wetan, elore Padalarang, Jawa Barat.
   Marek mudhun teka menteri iyane saiki dadi direktur utama PT Intermedia Capital, grupe Bakrie, ngganteni pak Erick Thohir hang dadi menteri BUMN. 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor