Kadhung Keluwung Ana Kuwung

Muhamad Novi Yusuf (dipublikasikan pada Kamis, 12 Agustus 2021 10:50 WIB)
- Esai



Ring mutere dina, kabeh sembarang hang urip padha nganteni hang aran njumbule serngenge nong bang wetan. Durung weruh ring dina iku arepe ana udan tah using hang penting kaya wong ngerandhu. Masiya gedigu rasa hang gancang iki mauka bakale dipara pisan nyang hang padha ngerandhu nong perujukane ulan ring wayah dalu. Isuk ambi bengi ya padha diserungkub nyang aran awang-awang. Ring ndhuwuran dhung padha ndeleng kabeh ambi mutiyarane endhas yaiku mata-mata hang meraji paribasane mata-mata kidang.

Delengentah wayah kapas-kapas ngelumpuk dadi payung nong ndhuwuran dadi anteng ngelumpuk dadiya warna padhang ya lega tapi ya saya nggawe warna derem uga peteng, anehe sunar teka lengser kuning wis nyembur nong werane donya hang wis kebeteng, mandar muga bisa kelaksan nong ati bisa nggawe seneng.

Wis kerasa dhung ana hang beda, kaya ramene pasar ring wayah isuk ambi ring wayah bedhug mesthi ana beda hang katon temenanan. Rame guyube ambi cumpleng sintrune wayah ya ana bedane padha ambi dhung biyasahe santer sunare serngenge ring wayah isuk uga kelipe lintang nong dhuwuran ring wayah dalu dhung wis mendung peteng mesthi ketara.

Tandha arep udan, gerigise bain bisa ngilangaken angenan. Paran maning wis gawe wurunge runtang-runtunge tandang gawe hang wis kelaksan, tetep ana hang maksa melaku paran hang wis ketap ana ring dalan.

Dhung wis cicir, hang mepe padha gancang-gancang ngentas kelambi hang dicanthol ring sang-sangan uga ana hang ring hanger. Paran maning hang mepe gabah uga cengkaruk padha gupuh lan siyap-siyap wedi keblesan kabeh. Hang akeh tumpukan kayu pecalan enggo ring bengahan, ana hang ndeleh montor ring ngarep umah hang sing ana garasine ya padha gupuh nyerungkub masiyatah ana hang digeningaken. Ana hang padha anter-anteran, wong nunggang sepidhah ring wayah mendhung gupuh-gupuh agage gaduga umah tapi ya tetep dibarengi nyetir kelawan ati-ati. Hang wis ana mantel ya ana bain hang gupuh pisan masiya setemene kadhung kenenga udan ya hing milu kepus. Dhung wis cicir ana hang susah ya ana hang seneng ring atine dhewek-dhewek.

Lahan tepat untuk iklan anda di sini.

Hubungi: skb@belambangan.com atau WA telp 0811843457


Derese banyu sak dom teka ndhuwur, kadhang ngantem rupa hang bisa merujukaken rasa gawur. Nong ati uga nong lambe hang mara nyeplos ngomong ngawur, byalak, najis, buruk, uga liyane hang nambah pikiran ajur.

Dhung wis deres, dhung disawangi liwat ring dalanan, akeh hang nong emperane umahe uwong-uwong. Kadhang ring pondhok-pondhok pinggir dalan uga ya ana hang ring ngingsore wit-witan. Dhung wis rejekine bisa kecaruk ambi kanca, tangga, uga dulur. Hang sing enak ya ketemu mantan ambi musuh. Ring saben wayah ana bain pemandhangan hang apik seru dhung ana lalare enom hang tepak ambi dhemenane utawa sir-sirane mesthine ngatonaken kemesraan ring adheme udan hang wis cicir mauka.

Sengidana wis nong paran hang bisa ngemuli teka adheme banyu hang mudhun, arep diitungi banyu hang mudhun yara tangeh lamun. Kadhang saya deres dienggo lalare enom ngelamun, tepak lare cilik saya girang kecek ring dalanan.

Dhung wis keluwung, sapa hang arep wurung? Bakale nyawang mendhuwur masiya wis sengidan kebuntel sarung, kerana nggoleti wujude pelengkungane warna-warnane kuwung.

Merana merene sak dawane laku sikil ya uga ana hang padha nunggang kendharaan hang wis biyasah keterak udan ya ayem atine, tapi hang tepak muring atine ya nana wis bakale udan hang disalakaken ambi cangkeme. Alae dhung wis ana hang weruh anane keluwung arepe ana semaya ring pikir kapan bisa weruh pucuke kuwung iku uga ana cerita gok ana widadari adus. Hang ayem atine mesthi disawangi bain paran maning wis ana kamera hang langsung diniyati kanggo dipotrek-potrek, ambi semaya ring atine bakale nggo kenangan cara lare saiki dienggo selpi.

Melayu utawa nunggang montor mesthi diterabasi, sebab dhung wis keluwung sing ana niyat nyulayani janji. Deresa tapi ya bakale sedhilut ya gelis mari, masiya goblosan yara ana winih kanggo gawe senenge ati.

Percaya tah sing tapi mula ana, kaya udan keluwung bisa kuwunge ana. Hang artine kudu wani keblesan dhung kepingin rasa seneng iku ana, derese banyu paran maning ana jepretane gilap iku aja dilalekena.

Anane kuwung ring wayah udan wis bisa dijelasaken ring cara ilmiah tapi anane cerita-cerita teka cangkem hang wujud jare wis padha merujuk ring pikirane masarakat hang hing bisa dilalekaken uga dibusek.

Kadhung keluwung ana wujude kuwung, Kadhung telekas ana gelise pungkas. Kadhung murub ana guyub, Kadhung gelem nyulungi sara ana pungkase seneng yara.

 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : pribadi

Editor: Hani Z. Noor