Kangbucks lan Kopi Lovin
Antariksawan Jusuf (dipublikasikan pada Jumat, 28 November 2025 04:40 WIB)
- Esai
Kangbucks lan Kopi Lovin
Amerika ulih mongkog nduwe Starbucks, ring Sepanjang Boyolangu duwe Kangbucks.
Setemene arane hang duwe warkop ring Krajan Boyolangu iku Kang Bag (Bagiyo), makene ketara sagah, katon gaul, tulisane dimemper-memperaken ambi warkop Amerika hang arane wis kondang sak donya iku. Gambar ikon-e semono uga, kadhung Starbucks nganggo gambare Siren, mahluk laut tunggale puteri duyung, Kangbucks njumput gambare gandrung.
Cerita sithik tepak bengen tau gesah ambi Kang Bag. Wong iki pantarane pamanisun, Man Munir (saiki wis ruwahe). Keloron jare mula kanca memengan sakat cilik, yong sak kampung; SD-ne awal taun 70-an aju sak kelas ya sak bangku. Abete padha mbenune. Man Munir tau dikeplak guru gara-gara 'Kangbucks'. Apuwa?
Dina iku, jam iku, ring kelas gurune tepak nguweni pitakonan pengetahuan umum, hang bisa njawab kon ngacung. Tepak pertanyaan "PKBR (Pabrik Kertas Basuki Rachmat) itu pabrik apa, anak-anak...?"
"Ngacunga, Nir!" Jare Kang Bag. Man Munir sakkal ngacung, ting serta dituding gurune kon njawab iyane bingung, gugup! Ambi Kang Bag dibisiki jawabane. Eh, telangan manut bain. Gok jawab maning memei tegas, "Pabrik gedhang goreng, pak!"
Mbegh Aja takon kauke kancane, ramene lare sak kelas. Gara-gara Kangbucks, Man Munir endhase keneng tepas.
Kopi Lovin
Iki cerita liya. Arane dhemen udud, doyan ngopi, isun wis tau nyorot kopi nganggo improvisasi, nyacak nganggo cara-cara anyar hang kira-kira lebih sedhep, lebih nikmat ring ilat. Antarane tau nganggo 'sabu' (sari tebu), temune wis langsung manis, sing kathik gula maning; uga tau nganggo banyu daugan. Karo-karone nyatane mula lebih enak rasane. Iku bengen.
Saiki ring negara manca rame usume kopi santen, wedang kopi dicampuri sarine kelapa. Susu diganti santen. Alhasil, garuse masa'alah. Hang nggawe kopi rasa anyar iki wong teka negara Cina, usahane dadi gedhi, melebu 10 usaha kopi paling gedhi sak donya. Ring Cina dhewek wis ngalahaken Starbuck, warkop hang wis lawas paling garus sak donya. Arane: Luckin Coffee. Kopine bisa impor teka endi-endi, ting jelase kelapane teka Sulawesi, coh! Nagud!
Iki isun nyacak nyorot kopi ala Luckin Coffee iku, hun campuri santen. Hmm...! Mula sedhep. Bengen dhemen-dhemene ngopi nganggo krimer biyasah mbatin rasane kaya ana santene. Iki hing kaya maning, iki mula kopi santen. Iki hun arani: Lovin Coffee alias Kopi Lovin.
(Iskak Basuki)
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
