Kecaruk Macan ring Ijen (Bagiyan 3, pungkas)

Antariksawan Jusuf (dipublikasikan pada Sabtu, 16 November 2024 06:57 WIB)
- Esai

Kecaruk Macan ring Ijen (Bagiyan 3, pungkas)

Ana uga cerita soal pendhaki manca hang kawitan nemoni penambang welirang, kerasa gumun lan kelayu. Wong-wong iku hing nyangka kadhung ana wong megawe ngandhelaken pisike semono abote, nggawa abote welirang hang abote sampek puluhan kilo hing dicawisi alat hang cukup kanggo amane lan selamete awak. Kahanan Iki dadi pengalaman emosional kanggo para pendhaki manca. Malah ana hang nganggep dadi pengalaman sepiritual.
   Salah siji hang nyedhot tekane para pendhaki manca yaiku geni biru (blue fire) hang mung bisa ditemokaken ana loro (2) ning donya, salah sijine ana ring Ijen. Merga sithike inpormasi ring jaman iku, akeh wong-wong hang teka nang Ijen taping sing ngarti bab geni biru, lan seru jengahe tepak ndeleng lan rungu suwara geni biru tengah wengi ning pinggir kawah.
Kanggo pendhaki manca, Gunung Ijen ning jaman semono dadi campuran antarane petualangan, misteri lan kaget budaya. Pengalaman iki kerep diceritakaken tepak iyane balik nong negara asale, lan dadi salah siji alasan Gunung Ijen lebih dikenal dadi jujugan unik kanggone pendhaki internasional.
   Ana uga pengalaman teka embokisun hang nyeritakaken pengalamane kancane. Gedigi ceritane. Kaya isun, iyane melaku dhewek ninggalaken rombongan kanca-kancane. Tepak sampek tegalan suket (padang sabana) iyane kekeselen. Aju iyane ngepos turu nong suket-suketan. Hing kerasa wis mara-mara kesoren lan peteng. Serta iyane tangi merga kerasa ana hang ngambus-ambus raine, iyane melek. Buru mberejag merga ana mata hang mencorong ring ngarepe. Aju iyane ngemati suwi buru sadhar gok iku matane macan. Pungkasane awake kaku hing wanen ubah, paserah, sampek macane ngalih. Dianteni rada suwi, ahire edheng-edheng melaku njujug nang Paltuding.  Sampek ning kono, cumpu kanca-kancane kelebu embokisun wis ana ning kono. Ning jaman iku mula magih ana macan tutul Jawa (Panthera pardus melas) hang kadhang teka ning alas sakubengane Ijen. Macan tutul setemene hing gelem kecaruk menungsa, taping kadhang mareki merga rasa kepingin weruh kadhung ndeleng ana uwong hang meneng turu ning njero alas.
   Ring jaman semono, ana pirangane spesies kucing gedhe hang magih ana ning alas-alas Jawa, yaiku macan tutul Jawa, hang kesuwur minangka salah sijine subspesies hang wis arang lan aseli ning Pulo Jawa. Populasine tau akeh, nyebar lan melaku-melaku ning alas gunung-gunung sakubengane Kawasan Gunung Ijen lan Meru Betiri. Macan tutul Jawa biyasahe nduwe tingkah kang seru ati-atine lan sebisane hing kecaruk menungsa. Tapi, kadhung kecaruk ambi menungsa hang tepak ason-ason wayah dalu, bisa-bisa marek merga rasa kepingin weruh paran maning wonge hing ubah lan hing ngetokaken suwara. Pendhaki hang melaku dhewek, meneng, utawa turu bisa dadi wigatine kewan. Matane macan hang katon mencorong bisa dijelasaken merga efek tapetum lucidum, lapisan husus ning matane kewan nokturnal (kewan hang aktip lan metune wayah dalu) hang mbalekaken sunar, nggawe matane katon mencorong nong petengan.  
   Anane macan tutul ning kawasan Ijen mula suda seru jumlahe, sakuwise taun 80-an merga anane ason-ason lan werane alas kang saya suda. Cerita bab hing nyeja nemoni kewan alas digu dadi pengalaman langka hang magih dadi memori para pendhaki lan nambah kesan misteriyus Gunung Ijen ning jaman semono.
   Saiki yawis ping kaping isun nyapa Kawah Ijen iki. Mula bengen sakat dadi tujuwan olahraga hiking para pecinta alam, ambi rute tracking hang asyik merga dalane hang ciyut akeh peligukan nembus alas sakat teka perkebunan Lijen sampek tegalan suket lalang Paltuding hang hun ceritakaken mau iku.
   Seperene saiki dadi jujugan kelenceran hang kesuwur kelawan geni birune lan dalan aspal hang nggampangaken sepidhah montor lan montor. Sapa bain bisa munggah teka lare bayek bisa gampang munggah kawah teka pos Paltuding. Paran maning saiki ana teroli hang siyap ngateraken sampai pucuk ndhuwur.
   Kawah Ijen sakat bengen ya padha, geni birune ya padha, cuma seperono durung dibranding. Wis sekaliyan bain dibangunaken kereta gantung teka Pos Paltuding sampek nggadug pucuk. Byek, Ijen bisa dadi panggonan jujugan kelenceran hang hebat wis.

(Edy Hariyadi)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.