Kepaling Arep Nguripaken Macaan Lontar Sritanjung

Antariksawan Jusuf (dipublikasikan pada Selasa, 06 Juli 2021 06:48 WIB)
- Esai



Tepak ana wong teka Badan Bahasa kapanane takon, sastra lisan paran ring Banyuwangi hang kudune diuripaken maning (revitalisasi)? Sakkal bain isun semaur: Macaan Lontar Sritanjung!
   Teka ahli Landa hang disertasine mbandhingaken tembang ring Jawa Tengah lan macaan ring Kemiren, Ben Arps, isun tau ditulungi juger-juger ring perpustakaan Universitas Leiden taun 2018.
   Tepak iku ana Lontar Sritanjung hang ditulis ring buku tulis samake kandel. Kadhung ndeleng kertase (hang disebut deluwang Jawa), kira-kira lontar iku ditulis ring bungase taun 1700an sampek kawitan taun 1800an.
   Ring bucu halamane katon rada cemeng merga kerep dibukak nganggo deriji hang wis dipoleti idu.
   "Bengen hang diwaca ring Banyuwangi iki ya lontar Sritanjung merga dienggo ngenget-enget asal-usul kedadeyan ngadege kutha Banyuwangi," jare pak Ben Arps hang tau manggon ring Kemiren telung ulan lawase. Lan salah siji wong liyan hang bisa ngomong basa Using.
   Saiki hang anjerah diwaca ring Banyuwangi ana Lontar Yusup kaya ring Kemiren, ring Cungking utawa ring Rogojampi. Dene ring Mondoluko lan Kampung Anyar, ana lontar Murub Muncar.
   "Ring macaan Lontar Yusup iku ana banyu hang diwani kembang maneka rupa diwadhahi baskom. Diombe tepak maca Arum-arum. Kebiyasaan iku setemene dijuwut teka Lontar Sritanjung. Merga banyu kembang iku mau arane Toya Arum utawa Banyu Wangi," jare pak Ben Arps.
  Balik maning nang Program Revitalisasi Sastra Lisan mau, lamuna bisa nguripaken maning tradhisi maca Lontar Sritanjung hing kira gampang kaya nguripaken maning tradhisi Basanan lan Wangsalan, hang pungkasane dipilih ring Badan Bahasa kanggo proyek revitalisasi mau. Basanan magih akeh dienggo ring uripe wong Banyuwangi sedina-dina. Gendhing-gendhing hang saiki ana magih akeh hang nganggo basanan. 

Lahan tepat untuk iklan anda di sini.

Hubungi: skb@belambangan.com atau WA telp 0811843457


    Beda ambi kadhung milih macaan Lontar Sritanjung. Jare Wiwin Indiarti, dosen Uniba hang wis neliti lan nge-transliterasi Lontar Yusup lan Tawangalun, akeh alangane nguripaken Lontar Sritanjung.
   "Lontar Sritanjung ana petang pupuh: Mijil, Ukir, Mahesa Langit, lan Durma. Siji-sijine hang magih bisa nganggo lagu macaan Banyuwangi iku mung Durma. Mijil bisa ditembangaken kelawan cara macapatan Jawa. Ukir magih bisa nganggo mabasa Bali. Pupuh Mahesa Langit malah wis hing dikenal ring metrum tembang hang ana. Tembang iki wis ilang nana pecake," jare Wiwin hang wis marek nggarap transliterasi Lontar Sritanjung.
   Jare Wiwin ring ritual macaan Lontar Sritanjung iku bengen hang nembang wong wadon kabeh, hing kaya saiki ring Lontar Yusup, wong lanang kabeh. "Iki ana hubungane ambi Islamisasi. Ana transisi teka Hindu nang Islam."
   Taping kadhung bener-bener bisa ditemokaken lan diuripaken maning, donya tradhisi macaan ring Banyuwangi mesthi saya rumang.
   Paran maning asile engko disebar nang lalare enom, didokumentasi kanggo diduduhaken ring sak ubenge negara.
   Taping ya kelendi maning. Merga iku kayane pilihan tradhisi hang arep diuripaken yaiku Basanan lan Wangsalan kelebu hing patiya sara.
   Dadi, impenan arep nguripaken macaan Lontar Sritanjung magih sewates impen.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor