Kesenian Banyuwangi Milu Festival ring Tenggarong Kaltim

Hani Z. Noor (dipublikasikan pada Senin, 25 Juli 2022 08:54 WIB)
- Laporan



Iwuh ring Kota Raja Tenggarong, Kalimantan Timur Kemis 21 Juli sore yaiku Tenggarong International Folk Art Festival (TIFAF) nampilaken rombongan teka Banyuwangi.

Kegiyatan seni lan budaya hang dibukak wagub Hadi Mulyadi iki minangka dadi ajang pamer potensi seni lan budaya dhaerah, kelebu pisan kanggone  wakil propinsi Jawa Timur hang ketepakan teka wolung uwong wakil hang dikirim, hang lima teka Banyuwangi.

Diwakili ambi 5678 (Manamjupan) Arr Studio, Pakis Asri, Sumberrejo Banyuwangi hang diketuai Miftahul Jannah lan didhukung tim liyane yaiku Gilang Ramadhani (Banyuwangi), Arda Fatimah Fania Ena (Malang) lan Yuniar (Surabaya) minangka dadi motor utama ring 5678 Arr Studio hang wis nduweni cabang ring kutha Malang lan Surabaya, hang anggotane mulai teka lare sekolah sampek dhewasa. 

Lahan tepat untuk iklan anda di sini.

Hubungi: [email protected] atau WA telp 0811843457


Masiya keitung magih buru ngadeg (2019), 5678 Arr Studio wis nyathet prestasi lan ulih pirangane penghargaan, tingkat Nasional lan uga International, teka kemendikbud, kemenparekraf lan Galeri Nasional.

Ring taun 2021 karyane kelompok iki kepilih ring Festival Film Tari International Imajitari dan Festival Videodance ring Burgundy, Perancis.  Lan taun iki karya videodance kelompok iki kepilih maning ring Festival Mobile Dance Film ring New York lan ulih kesempatan kolaborasi ambi sutradara wadon teka 11 negara manca sak donya.
Kabeh iki minangka salah siji upaya hang dilakoni kelompok 5678 iki kanggo ndadekaken potensi seni lan budaya hang diduweni wong Banyuwangi saya kesuwur ring negara manca.

Rombongan wakil teka Banyuwangi iki dipapag ketua harian Ikawangi Balikpapan Kang Budi Sakti Purnomo ring Bandara Sultan Adji Muhammad Sulaiman Sepinggan Balikpapan dina Rebo 20 Juli 2022, sedina sedurunge pementasan minangka Ikawangi iki organisasi keluwarga Banyuwangi hang mula ana ring saben-saben dhaerah.

Hang ditampilaken perwakilan Jawa Timur ring acara TIFAF yaiku:
1. Tari Jejer Jaran Dhawuk
2. Kolaborasi tari Remo, Glepang lan Gandrung
3. Tari Jejer hang dijugedaken penari gabungan teka Banyuwangi lan Tenggarong.

Dene Ikawangi Kukar seliyane nampilaken Tari Jejer Gandrung uga nampilaken Hadrah Kuntulan lan miloni Kirab Budaya.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Antariksawan Jusuf