Kesenian Banyuwangi Ngeramekaken PON XX Papua

Antariksawan Jusuf (dipublikasikan pada Jumat, 08 Oktober 2021 13:43 WIB)
- Laporan



Lahan tepat untuk iklan anda di sini.

Hubungi: skb@belambangan.com atau WA telp 0811843457


Kesenian Banyuwangi arupa Gandrung lan Jaranan Buta milu ngeramekaken acara Pekan Olahraga Nasional (PON) ring propinsi paling bucu wetan, Papua.
   Kanggo ngeramekaken PON XX hang dianakaken sakat tanggal 2-15 Oktober 2021, pemerintah Papua nggelar macem-macem acara. Salah sijine ana ring Terminal Mesran Jayapura kana yaiku Lomba Fotografi hang temane Kopi dan Wisata Papua. Ring kono dibukak pisan bazar UMKM kopi. Terminal Mesran iki minangka salah siji terminal penting ring ibukota kanggo ngubungaken angkutan umum trayek Jayapura-Pasir dua lan trayek Jayapura-Macan Tutul.
   Ring ngarep genjote iku saben-saben digelar kesenian utamane teka Papua dhewek hang teka wilayah sak ubengane ibukota Jayapura yaiku kota Jayapura, Kabupaten Jayapura lan Keerom, uga ngundang kesenian liya hang ana ring Papua kaya grup kesenian Banyuwangi. Tim kesenian Banyuwangi hang dibina Ikatan Keluarga Banyuwangi (Ikawangi) Papua ulih kesempatan nggelar tariane ping pindho, gedigu jare Ketua 1 bidang organisasi Ikawangi Propinsi Papua kang Kateno.
   Gandrung lan panjake mula anak turune wong Banyuwangi, dene jaranan butane penarine ana hang teka Ponorogo taping milu ring sanggare Ikawangi, jare kang Kateno hang asal Sembon, Kedung Agung, Jajag.
   Puluhan ewu wong Banyuwangi hang ngumbara golet penguripan ring Papua teka Sorong ring kulon sampek Merauke ring pucuk wetan kidul. Hing maido, Ikawangi akeh semebar ana hang ring Jayapura, Sorong, Manokwari, Keerom, Nabire, Merauke lan panggonan liyane. Anjerahe wong Banyuwangi, ring saben panggonan anyar, mesthi nggawa pisan keseniane. Cumpune diakoni pisan ambi pemerintah daerah kana.
   Sakat Desember 2020, Ikawangi Papua dipimpin ring kang Hadi Subroto dadi ketua umum hang anyar ngganteni kang Sarminanto hang wis kepilih ping telu sedurunge.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor