Lebaran Mancing ring Pondoknongko

Andi Sep Kurniawan (dipublikasikan pada Rabu, 11 Mei 2022 08:50 WIB)
- Laporan



Lebaran 1443 Hijriah wis melebu ring dina kepapat. Uwong-uwong magih padha silaturrahim nong umahe dulur-dulur lan tanggane. Dalan wis padha rapet, wong-wong kaya semut baris reruntungan. Paran maning kadhung wis dalu, hang katon mung ulape lampu.

Beda ambi uwong-uwong hang dhemen mancing. Sakat dina kepindho rame melaku ring pesisir utawa banyu hang akeh iwake. Salah siji desa hang dadi panggonan mancing yaiku Desa Pondoknongko. Desa Pondoknongko mula wis dadi jujugan uwong-uwong mancing, sing mung tepak dina lebaran bain naming dina biyasah uga wis rame. Uwong-uwong uga sing teka dhewekan, iyane nggawa anak lan rabine. Sampek-sampek ana hang nggelar kelasa. Mula hang aran dhemen sing bisa dicegah.

Ana ring dina kepapat sabene, jam 8 uwong-uwong wis padha anteng nyekeli palesan kerekane dhewek-dhewek. Ngawiti teka bucu kulon, sampek bucu wetan. Durung hang manggon ring tas kidul. Kadhung hang siji narik, uwong-uwong padha kauk-kauk. Hang durung ulih mangkat panas, karep-karepa ya gancang uliha pisan.

Masarakat Pondoknongko mayoritase dadi petani/buruh tani. Masarakat hang dadi nelayan mung sithik, iku bain mancinge ana ring tengah pesisir nganggo jukung has Pondoknongko. Jukung has pondoknongko digawe teka deling, diisi gabus. Sing ana hang nduwe, merga mula iku hase nelayan Pondoknongko.

Kadhung uwong-uwong mancing hang teka ring Pondoknongko, akeh-akehe teka njaba desa. Mancinge ana ring pelipise banyu Tambong. Iwak-iwak hang paling akeh dipancingi yaiku iwak Kakap, iwak Prongkol, iwak Belanak, iwak Abangan, lan liya-liyane. Uwong-uwong padha nguber iwak kakap lan prongkol, umpan hang biyasahe dienggo yaiku nganggo iwak cilik utawa nganggo jet (menganan hang memehi padha kaya iwak).

Sakliyane uwong nggolet kakap, uwong-uwong uga nggolet iwak liyane. Umpane nganggo urang urip lan gelepung. Nah, nganggo gelepung iki hang sing akeh uwong hang weruh. Jare Rizki, lare hang dhemen mancing biyasahe iyane mancing nganggo gelepung, ulihe iwak belanak, iwak sadhar, lan liyane. Rizki uga nduduhi kelendi carane nggawe gelepung enggo umpane mancing.

Bahan: gelepung, royco rasa sapi, mertega, lenga keletik, panili (bisa hing dienggo), marimas rasa poh utawa duren.
Carane: bahan iku mauka diuled dadi siji, diuled ramed. Aju dikukus kurang lebihe 10-15 menit. Aja kesuwen, kadhung kesuwen bisa dadi adonan donat. Kadhung wis mari, diuled ramed maning. Marek iku gelepung wis bisa dienggo.

Temakaken sing Rizki bain hang ngganggo umpan gelepung, uwong-uwong uga akeh hang mancing nganggo gelepung lan akeh hang ulih pisan. Kadhung jaman bengen, mancing nganggo cacing lemah utawa cacing gedhang, bisa pisan nganggo lumut. Umpan gelepung uga ana asil, Rizki ngomong kadhung iyane sorene maning ulih iwak belanak akehe sanga.

Lahan tepat untuk iklan anda di sini.

Hubungi: [email protected] atau WA telp 0811843457


Kelendi, marek lebaran kopat mancing tah?

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Antariksawan Jusuf