Munggah Ijen Jaman Taun 1980/90an (Bagiyan 1 teka 3)
Antariksawan Jusuf (dipublikasikan pada Kamis, 14 November 2024 06:38 WIB)
- Esai
Munggah Kawah Ijen Taun 1980/90-an
(Bagiyan 1 teka 3)
Ditulis ring Edy Hariyadi
(Cerita iki spesial kanggo kanca-kanca pecinta alam Akar SMADA 89 Banyuwangi, Nil satis nisi optimum)
Munggah Kawah Ijen teka Desa Licin, Banyuwangi jaman bengen kudu liwat dalan cilik ning tengah alas. Kahanane mula beda ambi saiki hang sembarange wis digampangaken. Wektu iku, melaku munggah nyang kawah Ijen diangkati teka Desa Licin, Banyuwangi, hang bengen magih dadi desa cilik lan dalan hang sengkan, akeh watu rejeng lan kadhang kadhung rendheng akeh endhut. Para pendaki kudu liwat dalan setapak hang akeh peligukane lan rada ciyut. Sedawane dalan alas dhirik wit-witan gedhi, tanduran pakis-pakisan buta, lan tanduran alas liyane. Suwara kewan alas kaya manuk lan serangga nyampur ambi suwara jangkahe sikil para pendaki hang nimplik lemah, mula kahanane sepi taping tantangan jare lare pecinta alam. Pokoke jaman semono, jare lare-lare pecinta alam Banyuwangi, “Aja ngaku pecinta alam kadhung durung tau munggah sampek Kawah Ijen”.
Para pendaki biyasahe mangkat mari magerib, makene gadug Paltuding nepaki emeh tengah wengi. Aju ngepos sedhela, mari iku kira-kira jam telu isuk munggah maning nong arah kawah. Iku mula ngepasi arep bisa ndeleng serngenge melecir. Maning kadhung magih isuk, pedhut kandel durung mudhun lan nutupi pemandangan kawah belerang hang werna ijo semu biru.
Bengen isun magih SMA kerep munggah nong Kawah Ijen. Biyasahe sak durunge munggah, isun lan Mega, kancanisun, melibeng nong kampung desa Licin, dodolan obat-obatan hang dibutuhaken wong desa, umpamane obat penambah darah, dailyvita, terlambat bulan, obat ngelu, pil Kita, puyer, lan liyane. Wong wong desa iku mula geromyoh seru. Kadhang tukune mung rongatus rupiyah, rong pil umpamane, taping kene kadhang diweni gedhang, utawa sawi godhog, lan liya-liyane. Aju picis ulihe melibeng iku, ditukokaken indomie lan roti. Marek iku, mangkat munggah mari magerib. Pokok aja lali nggawa banyu lan panganan kerana ring dalan cilik iku hing ana sumber banyu. Setemene ana banyu cilik mili ring ngisore sasak cilik ring tengah alas. Tau tepak dalu yara hing pati katon, pokoke njuwut banyu hang mili iku. Tepak mulihe mudhun teka Kawah Ijen, wis raina katon padhang yara, byek nagud, banyu mili uni bengi iku katon, nagud nong pinggirane cumpune akeh naimin ya. Wis tah lare-lare pendaki iku, padha ngising nong entasan ya. Nagud yara wis.
Nggadug ring pucit kawah, pemandhangane apik seru lan suwarane kawah belerang kaya wis nganteni para pendaki. Wektu iku, para penambang welirang teradhisional uga wis mangkat megawe sakat dalu. Wong-wong iku setengah mati mecah welirang hang wis adhem mbeku ring pinggiran kawah lan asile dipikul nganggo keranjang. Para pendaki kaju ambi jayane wong welirangan. Bayangena iyane kudu liwat dalan hang padha ambi dalan mudhune mau, ambi nepak welirang hang abote bisa ngelebihi abote awake dhewek ning pundhake.
Munggah Gunung Ijen ring jaman 80an/90an bener-bener ana kesan petualangane aseli, hing nganggo paran-paran kaya saiki.
Pendaki hang wani munggah wayah bengi, utawa hang teka ring ulan-ulan husus, uga bisa ndeleng anane geni biru (blue fire) hang metu ring pinggir-pinggire kawah. Endah seru. Endahe wis kaya dadi hadhiyah kanggone para pendaki hang wani nerak dalan ciyut lan alas sepi, ndadekaken kenangan hang hing bisa dilalekaken para pendaki jaman semono.
Nalikane magih nang alas lan mareki tegalan suket, isun tepak munggah hang kaping sepisan, rungu suwara gemuruh hun tanggo suwara sepur. Byek pikirisun, enak mariki ana dalan sepur. Minangka pendaki anyar ana rasa was-was ambi kahanan alas hang sepi lan ebek suwara alami. Naming nyatane suwara iku asale teka Kawah Ijen hang wis rada parek. Iki dadi pertandha kadhung puncak wis parek. Suwara iku ndadekaken rasa kepingin weruh lan nantang, nggawe para pendaki ngerasa kaya ana misteri gedhe hang nganteni ring alas lan tegalan suket iku.
Kanggone pendaki hang kawitan munggah Gunung Ijen jaman iku, pengalaman parek tegalan suket (padang savana) iku kerasa ana misterine. Tepak melebu lebih jeru maning ning alas lan mareki kawah, biyasahe rungu suwara gemuruh hang samar. Suwara iki has seru kaya abane sepur hang melaku nong kadohan. Kanggo pendaki anyaran, suwara iki kadhangane nggawe bingung lan rada nggawe waspada, paran maning ring alas hang sepi, biyasahe mung diisi suwara kewan-kewan alas,gedhi utawa cilik.
(ana sambungane)
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.