Pentas Macaan Pacul Gowang Arep Ditekani 'Menteri Penerangan'
Antariksawan Jusuf (dipublikasikan pada Rabu, 20 Oktober 2021 11:24 WIB)
- Laporan
Pementasan Revitalisasi Sastra Lisan Berbasis Komunitas, Macaan Pacul Gowang, hang dianakaken tanggal 27 Oktober engko pacane arep digelar ring pelataran kantor Dinas Kebudayaan dan Pariwisata Banyuwangi.
Serehne saiki wis wayahe mangsa rendheng, kelendi kadhung udan? "Tenang bain ana 'menteri penerangan' alias tukang sarang," jare kang Hasan Basri ketua Dewan Kesenian Belambangan (DKB) ambi mesem-mesem.
Panitiya teka Badan Bahasa, kang Nur Achid Prasetyawan negesaken gok pementasan iku arep dipiloni kira-kira 10 grup hang ulan Agustus sore wis dilatih ring pirangane instruktur, kelebu cak Ikhwan, kang Ali Kenthus, kang Slamet Penyet, pak Misran Watukebo, kang Aden Syahlana, kang Fauzi Abdullah lan liya-liyane nong Pelinggihan Disbudpar.
Iwuh iki nduwe tujuan nguri-uri (revitalisasi) sastra lisan hang wis emeh ilang, makene dijejegaken maning ring masarakate.
Teka diskusi njero kawat (daring) tanggal 19 Oktober sore, dipastekaken teka pementasan iku arep digoleti Penyaji Terbaik 1,2,3 lan Penyaji Terheboh. Ana uga hang penilaian kanggo perorangan yaiku Laikan Terbaik lan Naskah Terbaik. Dene grup liyane itungane kelebu Penyaji Unggulan non-ranking.
Dene dewan jurine, ana Cak Ikwan, kang Ali Kenthus, kang Slamet Penyet hang dadi pelaku seni Macaan Pacul Gowang, uga ana pak Sungkono teka Komite Sastra DKB lan kang Abdullah Fauzi teka Disbudpar.
Sedina sedurunge, tepak nata panggunge, sekaliyan arep dianakaken pengundian nomer urut. Acarane arep digelar dina Rebo tanggal 27 Oktober diangkati jam 19.00 sak mareke.
Ring daptar undangane, sak liyane para pejabat yaiku Bupati Banyuwangi, Kepala Dinas Kebudayaan dan Pariwisata, Kepala Dinas Pendidikan, Kepala Dinas Pemuda dan Olahraga, Kepala Cabang Dinas Pendidikan Propinsi Jatim, pirangane anggota DPRD, uga ana pelaku seni Macaan Pacul Gowang yaiku pak Misran Watukebo lan pak Jubaidi.
Iwuhe Badan Bahasa hang ana ring ngingsore Kementerian Pendidikan dan Kebudayaan, Riset dan Teknologi iki disokong ring Dewan Kesenian Belambangan lan Sengker Kuwung Belambangan.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
