Pondhoke Wong Banyuwangi Kobongan ring Kalimantan Timur

Antariksawan Jusuf (dipublikasikan pada Senin, 11 Oktober 2021 10:03 WIB)
- Laporan



Lahan tepat untuk iklan anda di sini.

Hubungi: skb@belambangan.com atau WA telp 0811843457


Sapa hang tega ndeleng dulure hang kesusahan? Paran maning dulur iki ana ring tanah boroan. Iku hang dirasakaken ambi dulur-dulur Keluarga Kerukunan Banyuwangi (KKB) Bontang Kalimantan Timur hang sanja nyang pesantren hang marek kobongan.
   Pesantren Darussholah Jalan Trisakti, Kampung Kajang, Kutai Timur iki diedegaken ring wong Banyuwangi hang asale teka Tambakberas. Ring kene ana 53 santri hang mondhok.
   Bantuwan arupa picis gedhine 10 juta lan sembako gedhine pitung juta dielungaken dina Minggu sore ring Ketua Umum KKB Bontang kang Sukmo Raharjo lan pengurus liyane yaiku pembina kang Eko Widaryanto lan kang Sunaryo, kang Bagus Syuhada, kang Nurhidayat, kang Benny Tri Setiyawan, lan kang Deddy Effendy.
"Kegiyatan iki kanggo mbantu sithik-sithik dulur hang dadi korban kobongan lan uga wujud perduli lan solidaritas nang dulur-dulur Banyuwangi," gedigu jare Pembina kang Eko Widaryanto ring sambutane kaya diomongaken ambi kang Nurdidayat nang belambangan.com.
   Bontang iki panggonane kira-kira enem jam teka Balikpapan kadhung nunggang montor.
  Masiya ring akta notarise ketulis KKB, paguyuban wong Banyuwangi hang tanggal 11 Nopember iki wis emeh 30 taun taping sedina-dinane kesuwur ring aran Ikawangi. Salah siji alasane kanggo mbedakaken ambi KKB liyane yaiku Kerukunan Keluarga Bone hang teka Sulawesi, hang uga aktip ring Bontang kono, jare kang Nurhidayat hang asal Sraten lan megawe ring PT Badak, perusahaan gas ring Bontang.
   Ikawangi Bontang iki taun 2018 sore kecathet nduwe emeh 2000an anggota. Sakliyane Bakti sosial, program-programe ana Sambang Dulur yaiku nekani dulur-dulur hang keneng musibah, Arisan, Pengajian, lan kaya wong Banyuwangi diaspora liyane nguri-uri kesenian Banyuwangi ring Sanggar kesenian "Sayu Wiwit" hang duwe Gandrung, Jaranan Buta, Hadrah lan Kendhang Kempulan. Latihane bisa ping telu seminggune.
   Keseniane, utamane Jaranan Buta, wis kerep diundang merana merene ambi perusahaan-perusahaan lan uga dulur Banyuwangi hang ana ring Kalimantan Timur sampek ring Balikpapan lan ibukota Samarinda.
   
Laporan: Arief Sugiono, Balikpapan

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor