Pondoknongko Nggelar Pelatihan Perbengkelan Kanggo Lalare Nom-noman
Andi Sep Kurniawan (dipublikasikan pada Selasa, 15 Juni 2021 08:25 WIB)
- Laporan
Pelatihan perbengkelan hang dianakaken limang dina sakat tanggal 8 sampe 12 Juni taun 2021 ana ring Kantor Desa Pondoknongko sasate sing ana alangan paran-paran. Pelatihan diangkati sakat jam wolu sampek jam telu soren. Lalare lancing hang milu pelatihan katon guyub, fokus ambi materi hang disampekaken lan giyat ulihe praktek.
Peserta pelatihan dijuwut teka lalare hang mula dhemen ring donya perbengkelan. Saban dhusun ana wakile, makene adil lan rata. Didata ambi kepala dhusun sakteruse dilaporaken ring Kepala Desa hang jumlah pungkasane ana 10 peserta. Kegiyatan pelatihan resmi dibukak ambi Kepala Desa, pak Hamdan Ramahutmuzi, ana ring kesempatan iki iyane nguweni pesen, "Mayo pelatihan perbengkelan iki dienggo nambahi keterampilan utawa keahlian kanggo awake. Ditemenani ulihe milu pelatihan makene anane pelatihan sing siya-siya."
"Sakliyane iku, Isun nguweni pesen kanggo Rika kabeh yaiku telung prinsip hang kudu diduweni awake. Siji disiplin, loro niyat, telu serius. Maksude disiplin ana ring waktu, niyat golet ilmu, niyat belajar, lan temenanan ulihe ngelakoni kabeh mauka. InsyaAllah telung prinsip mauka bisa ndadekaken awake dhewek lebih siyap ngadhepi lakune urip," tambahe pak Hamdan.
Pelatihan perbengkelan iki aseli kegiyatan teka kabupaten yaiku Dinas Pemuda lan Olahraga (DISPORA), Desa Pondoknongko dadi fasilitator kegiyatane. Alure Pondoknongko ulih pelatihan perbengkelan, masarakat ngajokaken pelatihan nepaki kegiyatan musrenbangdes (musyawarah rencana pembangunan desa) lan ahire diterima ambi uwong kabupaten. Saben desa ngusulaken 10 peserta sarate umur 16-30 taun. Sakliyane Desa Pondoknongko hang ulih pelatihan ana desa liyane kaya Desa Paspan, Desa Gumuk, lan sakliyane.
Pelatihan perbengkelan dimentori ambi uwong hang wis ahli ring perbengkelan, uga gawanan teka uwong kabupaten. Lalare diajari pelistrikan, pengapian, ngerijigi karburator, ngecek kabel-kabel, lan liya-liyane. Peserta pelatihan bengkel uga diuweni alat bengkel, sak set idhang wis dadi duwene dhewek. Ana ring bungase dina, pelatihan ditutup ambi Kepala Desa. Lalare ditakoni pesan, kesan lan pengarepane siji-siji, asile padha berkesan lan magih semangat ulihe belajar, uga penjaluke muga-muga ana pelatihan lanjutan maning.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
