Ritual Adat Seblang Olehsari

Nur Aini (dipublikasikan pada Jumat, 13 Mei 2022 07:22 WIB)
- Laporan



Sakat melebu ulan Syawal, akeh tradhisi hang dilaksanakaken ring Banyuwangi, salah sijine ritual adat Seblang. Kadhung nganggo "ilmu cocokologi", Seblang iki diartekaken ‘Sebele Ilang’ hang nduweni maksud kabeh perkara hang sing nyenengaken kaya lelara, musibah, lan liya-liyane bisa ilang. Hang dijaluk yaiku keselametan. Ritual Seblang hang penarine kejimen (trance) iki mung ana ring rong desa yaiku Desa Bakungan lan Olehsari. Seblang Olehsari digelar sakwise Idul Fitri. Kadhung Seblang Bakungan dilaksanakaken sakwise Idul Adha.

Ring taun 2022, ritual Seblang Olehsari wis mangkat sakat Jemuah 6 Mei sampek pitung dina mengarep. Ritual Seblang biyasahe mangkat jam 14.00 sampek ngarepaken magrib.

Ritual Seblang beda ambi ritual adat liyane, ritual Seblang kelebu unik merga penari Seblang njuged muteri panggung adat naming penarine sing sadhar uga matane merem. Sakliyane iku, sing kabeh uwong bisa dadi Penari Seblang. Penari Seblang wis ditamtokaken ring rohe leluhur hang sedurunge rituale digelar ngeleboni ragane salah sijine uwong, dene penarine magih duwe keturunan ambi penari Seblang sedurunge. 

Lahan tepat untuk iklan anda di sini.

Hubungi: [email protected] atau WA telp 0811843457


Penari Seblang taun iki yaiku Susi Susanti. Marek matane ditekepi, lan tampah hang digawa wis cicir, tandhane iyane wis kejimen. Susanti njuged ning panggung adat ring ngingsore payung agung ambi diiringi gamelan lan gendhing mantra. Endhase nganggo omprog hang digawe teka pupuse godhong gedhang lan direngga kembang-kembang hang arum gandane.

Ring tengah-tengah jugedan, penari Seblang nguncalaken sampur hang wis digulung-gulung ring penonton. Sapa bain hang keneng sampur, kudu maju milu njuged bareng ambi penari Seblang.

Kadhung wis gendhing Kembang Derma digandhangaken, penari Seblang nggawa tampah hang isine Kembang Derma. Kembang hang dikundhuki iki dienggo rebutan wong-wong hang percaya gok kembang iku bisa nggawa nasib apik. Kadhung wong tani kembange dideleh ring kedhokan makene sawahe hing keneng hama. Ana hang dideleh ring umahe dienggo nulak balak. Kanggo lalare lancing lan perawan dipercaya bisa nggawe entheng jodho. 

 

 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor