Anggitane: Antariksawan Jusuf
(Minggu, 02 November 2025 06:49 WIB)

(Roncean Cerita) Gendhing Kembang Cicir (4)

(Roncean Cerita) Gendhing Kembang Cicir (Bagiyan 4)
Dianggit ring Kang Ujik

    Tejo lan Mariyamah mangan nyen sampek entek. Es teh diuyub keloron ya uwis entek. Mari mbayari, lare loro iku melaku maning sampek gadug pertelon kampung.
      “Aja lali engko teka ring bale desa. Rapat!” abane Tejo ngengetaken.
     “Alak iyok…..emeh lali…ampirana!” jare Mariyamah.
      “Mari Isak ya…..engko tah, leren nganteni uwong dandan Isun iki. Sak uwen-uwen…!”
     “Sing omes tah wis?”
     “Masa gedigune…..dadi uwong iku aja dhemen dianteni uwong liya. Bangur nganteni”.
    “Enggeh Pak Guru….!” abane Mariyamah ambi kaya hormat ring pendhera, aju ngincling ninggalaken Tejo hang magih ngadeg nganggreng nyawang jangkah-jangkahe Mariyamah. Ambi munyik dhewek, Tejo mulih  nggawa keringet ring raine. Kerana durung melebu wayah bedhug, Tejo ngeluk boyog ring pelanca galar.
    “Mak, nawi kesirep, bedhug gugahen ya Mak!”
    “Sing madhang sulung tah?” takon emake hang aran Bik Indun.
   “Mari mangan nyen mau ambi Mariyamah!”
   “Engko nawi elom madhanga Jo. Mari bedhug emak ngerangsum apake ring sawah!”
   “Gampang wis, Mak!”
   Tejo nggelethak. Gelibag-gelibeg sing kesirep-kesirep. Emake ngengekaken cendhela hang parek ambi pelanca panggonane Tejo ngeluk boyog. Angin silir-silir melebu teka cendhela. Tejo kesirep.
                               * * *
    Bengi iku bale desa uwis akeh lare enom-noman hang teka. Ketua-ketua RT lan RW  uwis cukup lan sing  luput para pengurus PKK uwis padha kemeriyek ngalah-ngalahi rawatan pitik sak kandhang. Kari nganteni Kades Wilin, rapat aju diangkati. Suwarane uwong sak bale desa mara-mara mandheg, meneng cep. Kades Wilin teka ambi rabine. Ana unen-unen, rabine Kades Wilin kaya dadi camat. Umpamane Wilin  dadi camat, nawi bain rabine malah kaya dadi bupati. Naming sembada. Parek ambi masarakat, loman ning wargane, belater lan dhemen sambang-sambang. Meneng-meneng keliling ring umahe para randha ambi nggawa beras lan picis. Apuwa masarakat sing nyalonaken rabine Wilin bain? Jare Kades Wilin, kadhung rabine hang dadi Kades malah sing bisa ubeg. Nana hang ngurusi kebonan kelapane, nana hang ngurusi persawahane, nana hang ngurusi usaha panggonan wisatane lan nana hang gelem titen ngurusi warung-warunge.
“Assalaamualaikum warohmatulloohi wabarookaatuh….!” Kades Wilin ngawiti kalam kelawan salam. Uwong hang ana ring bale desa padha nyemauri.
   “Dulur, setemene Isun mung mbukak rapat bain. Tugase uwong lanang ra mula tukang bokak-bokak ra yuh……!” abane Kades Wilin muyab. Kabeh hang teka pada cekakakan, ana ambi hang naboki pundhake kancane hang lungguh ring kerosi iringane.
  “Gedigi dulur…..Sabene ana pengurus tukang paes kemanten kabupaten. Teka merene arep nganakaken sosialisasi busana kemanten teradhisional Banyuwangi yaiku Mupus Beraen Belambangan. Busana kemanten teradhisional duwene Banyuwangi iku uwis kelebu busana kemanten teradhisional tingkat nasional. Mulane kabeh warga sak Banyuwangi kudu meruhi lan hang penting maning, nawi Rika duwe gawe ngawinaken anake, nganggowa busana kemanten Mupus Beraen Belambangan iku..Sak teruse Sun paserahaken ning Ketua PKK desa kanggo  mimpin rapat bengi iki!” abane Kades Wilin ambi maserahaken mik ring rabine. Nalika nerima mik iku, Bu Wilin tepak mungkruk ambi merem.
   “E, Ibu PKK….terimanen ra yuh. Kaya sing tau ngethemi mik yuh,” abane Kades Wilin nggawe Bu Wilin kaget lan kabeh peserta rapat padha ketheng ngerungokaken omongane Kades Wilin mau. 
   Rabine meringis bain merga uwis ngerti sipate hang lanang mula mbelubud gedigu iku. Ambi gemuyu, Bu wilin aju nyandhak mik hang dielungaken lakine.
“Assalaamualaikum……warohmatulloohi, wabarokaatuh….!” abane Bu Wilin ngawiti kalam. Kabeh hang ana nyemauri, "Wa’alaikumussalaam warohmatulloohi wabarokaatuh…!”
   “Gedigi dulur…..dina ahad hang arep teka, ring bale desa iki arep ditekani rombongan pengurus tukang paes Banyuwangen. Akehe kira-kira nggadug 40 uwong. Sak liyane nyampekaken kabar masalah setatus busana kemanten Mupus Beraen Belambangan, uga arep nganakaken peraktek dandan busana kemanten iku. Kira-kira sapa hang gelem didandani?” takon Bu Wilin. Nana hang ngewarahi sedurunge, kabeh hang teka ring bale desa nyebut arane Tejo ambi Mariyamah.
   “Kelendi Jo….Mar….gelem?” takone Bu Wilin. Tejo lirik-lirikan ambi Mariyamah. “Sing gelem ya ngaliha bain wis  teka desa kene,” poyoke Bu Wilin. Uwong sak bale desa ngakak.
   “Liyane, ulih tugas paran Bu?” takon Surontok Ketua RT 01/Rw 05.
    “Para Ketua RT lan RW maes bale desa iki. Ring lawang pager kana pasangana janur, ring jero bale kene iki aja lali dipaes ambi rumbai-rumbai tawon. Butuh meja dawa kaya mejane lare sekolah. Engkisuk Sun omongaken ning kepala sekolah. Butuhe mung papat. Hang rumangsa lanang kudu nulungi junjung-junjung. Kelebu uga Pak Wilin. Kadhung sing gelem junjung-junjung kongkon nganggo kotang bain Pak wilin iku. Pengurus PKK Desa, RW, RT ayo ngersaya nyepakaken suguhane lan kanggo madhange!” abane Bu Wilin tandhes.
   “Cocog, cocog……Engko iki mari rapat, madhang-madhang tah Bu?” poyoke Sarbinik ambi nduding Pak Wilin.
   “Aja kuwatir……..Bu Wilin wis mbeleh rawatane kang sarbinik……nyambit….!” Balese Pak Wilin. Sakkal uwong padha ngakak.
   “Guyon Pak Wilin……guyon….masa apus….!” Balese Sarbinik ambi dhehem. Masiya tah wis gorokane sing gatel.
   “Gedigi……Kang Sarbinik saiki ngadega ring pinggir dalan ngarepe bale desa iki. Ana uwong nyurung rombong, dodolan paran bain, giringen melebu ning bale kene….!”
    “Siap Bos!” abane Sarbinik ambi ngadeg lan hormat kaya kopral ning komandhane. Aju gancang melaku ning ngarepe bale desa. Saben ana suwarane thinthing-thinthing dikeploki lan diawe ambi Sarbinik. Kaya hang dikarepaken Pak Wilin, ring latar bale desa uwis ana telung rombong nyen, rong sepidhah rombong puthu lodok, rombonge terang bulan lan martabak uga ana telung sepidhah bakpau.
    “Eh, rapat iki wis di tutup tah?” takon Kades Wilin.
   “Durung, Pak!” semaur Kang Nanang, Ketua RW 04.
    “Perandane kari kemeriyek yah….ayo ditutup sulung aju antri bareng."
     "Dulur, nawi ana salah lupute, Isun keloron njaluk sepura. Wassalaamu’alaikum Warohmatulloohi wabarookaatuh!” abane Kades Wilin nutup rapat.

(Ana terusane) 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.