Sembayang Id ring Hongkong

Tirto Arum (dipublikasikan pada Kamis, 12 Mei 2022 08:44 WIB)
- Laporan



Sak mareke gelombang kaping lima omicron wis rada suda, Hongkong wis mangkat dibukak maning sak mareke proses telung ulan ditutup (lockdown). Pemerintah Hongkong wis mangkat ngulihi wong papat mangan ring restoran bareng-bareng lan ngewani idin nyang wong Islam kanggo salat Id rame-rame. 

Sore iku wong Islam ngelakoni salat Id ana ring petang masjid hang wis diulihi ring pemerintah Hongkong. Yaiku masjid jamik Kowloon hang ana ring Tsim Tsa Tsui, masjid jamik Wan Chai, masjid Mid land lan masjid Stanley.

Merga hang milu salat Id ambyak-ambyakan sampek sembayange dianakaken ping enem gelombang gantenan. Tepak tanggal siji lan loro Mei sore setemene barengan ambi prei nasional Hari Buruh Internasional yaiku tanggal 1 Mei. Dene tanggal lorone bareng ambi 1 Syawal 1443 H. Sembayang Id hang biyasahe dianakaken ring lapangan Victoria park, Meifoo, Yunlong taun iki hing diulihi merga panggonan iku magih disemprot disinfektan

Lahan tepat untuk iklan anda di sini.

Hubungi: [email protected] atau WA telp 0811843457


Mbeludhage jamaah sembayang Id ring masjid agung Tsim Tsa Tsui Kowloon sore iku ndadekaken tambahan penggaweyan kanggone pulisi hang ngatur lalu lintas sampek kudu masang garis pulisi paran iku.

Derese udan lan adheme hawa hang diiring angin hing sithika ngurangi kekarepane wong Islam kanggo golet sucine ati. Endahe ulan Syawal bangete wong Islam sak donya ngakoni salah lupute lan njaluk sepura nang wong liya.

Rasa kaju, girang lan nelangsa kaya mulek dadi siji kanggone wong Islam ring dina hang fitri iku, paran maning hang adoh ring keluwarga kaya para buruh migran lan isun dhewek. Hing kerasa iluh temetes sak njerone suwara takbir. Silaturahim nyang dulur-dulur mung bisa kelaksan kelawan cara virtual. Rasane dhadha kaya ampeg naming merga kudu golet upa buruh migran kudu kuwat ngelilakaken lebaran sing bareng keluwarga. 

Tepak ring tanggal 8 Mei sore, Hongkong uga wis milih presiden anyar yaiku Bapak John Lee Ka-Chiu hang madeg ngganteni presiden dhongkol yaiku Miss Carie Lam. Pak John menang mutlak kelawan angka sewu limang atus lebih suwara. Buruh migran ngarepaken kepemimpinan presiden anyar iki bisa mbecikaken nasibe buruh migran. 

Hongkong hang saiki wis rada lega merga pagebluge wis rada suda, wis mangkat mbukak aturan kanggo wong hang kumpul-kumpul. Maksimal wong papat wis ulih kumpul, ulih hing nganggo topong (masker) kadhung tepak olahraga lan restoran wis diulihi wong wolu lungguh sak meja.  

Dina lebaran Idul Fitri iki kerasa endah kanggone buruh migran merga bisa salat Id maning. Muga-muga sujude awak-awak ring antarane takbir bisa nggawa rasa girang lan berkah bisa ngilangaken pageblug. Muga-muga kene bisa kecaruk maning ring ulan Ramadan taun ngarep kelawan kahanan hang saya apik maning.

Cheung Sha wan, 10-5-2022

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : Tirto Arum, Lebaran di Hongkong

Editor: Antariksawan Jusuf