Tamba Kangene Ati ring Ikawangi Jember

Antariksawan Jusuf (dipublikasikan pada Selasa, 12 Oktober 2021 11:11 WIB)
- Laporan



Lahan tepat untuk iklan anda di sini.

Hubungi: skb@belambangan.com atau WA telp 0811843457


"Tamba Kangene Ati" hing mung sewates lirik gendhing Banyuwangi naming wis dadi siji ambi jiwane wong-wong diaspora Banyuwangi. Masiya mung urip parek, paribasane rong peligukan bain wis nggadug umah, rasa kangen ring tanah kelairan seru gedhine. Kelebu wong-wong hang manggon ana ring Jember. Masiya paling parek, cumpu ngawiti nggawe organisasi buru kelaksan ring ulan Oktober 2021 iki.
   Ikatan Keluarga Banyuwangi (Ikawangi) Korwil Jember dikawiti teka gesah wong-wong hang ana ring kutha mbako iki, tujuwane makene wong asal Banyuwangi bisa urip rukun lan guyub ring boroan lan bisa milu nguri-uri budaya lan tradhisi Banyuwangi kaya dene hang wis dilakoni dulur-dulur diaspora ring panggonan liyane. 
   Organisasi Ikawangi hang ngayomi wong-wong Banyuwangi ring tanah boroan wis akeh hang diedegaken kelawan pusate ring Jakarta, gedigu jare Ketua Dewan Pembina Ikawangi Jember Ir. Moh. Rofiq Sugiarto tepak ditemoni ring RRI dina Sabtu kepungkur.
"Organisasi Ikatan Keluarga Banyuwangi utawa IKAWANGI Jember iki mula diedegaken taping wis mangkat ngawiti kiprahe kelawan nggawe pertemuan ring umahe Kang Asnawi, warga Banyuwangi hang uga dadi tokoh ring desa Arjasa Jember, kelawan tema: Rika Dulur Isun, Isun Dulur Rika, Rika lan Isun Seduluran Selawase.
   Tema iki minangka prinsip wong Banyuwangi hang adoh teka ring tanah kelairan sak perlu nguripaken seduluran ring antarane wong Banyuwangi. Naming hing mung nggelar ketemuan taping uga diomongaken kelendi carane bisa ngewani kontribusi nang masarakat lan anggota liwat program kerjasama ring saben-saben pertemuan hang ngewani manpaat nyang wong akeh.
"Mengarepe program hang direncanakaken yaiku Bakti Sosial, Pentas Budaya Osing, Bazar UMKM,  Peringatan Hari Besar lan kegiyatan hang apik liyane," jare Ketua Ikawangi Jember, Dr. Slamet Hariyadi, S.Pd, M.Si.
   Pertemuan ring umahe kang Asnawi iku bisa kelaksan merga miloni protokol kesehatan.
   Anggota hang kecathet wis lebih 100 wong, naming hang teka ring pertemuan kawitan iku mung setengahe. Naming hing ngurangi semangate anggota kanggo guyub ambi dulur-dulure.

Laporan: Rohman

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor