Tari Jaran Goyang Nggoyang Hongkong

Tirto Arum (dipublikasikan pada Rabu, 13 Oktober 2021 08:29 WIB)
- Laporan



Eseme lare wadon ayu bisa nggawe atine lare lanang kesengsem kerasa dheg-dheg ser paran maning kadhung merujuk rasa welas nong larene, dadi rasa hang endah seru. Taping kadhung mung welas-welas dhewek, kaya kendhang ditabuh selisih, aju metu hang aran santhet pengasihan  bisa bain dadi ngelarani lan hubungane hing bisa langgeng. Cerita iki hang dadi intine adhegan tari hang diarani Tari Jaran Goyang. Jaran Goyang iki setemene aran aji-aji pengasihan kanggo ngeraketaken hubungan hang setemene hing rapet.
   Tepak dina Minggu 3 Oktober sore ring Cafe dhaerah Kwai Hing hang bisa nampung kira-kira 100 uwong, tim Sekar Jati Budoyo Hongkong diundang kanggo ngeramekaken dina dadine dulur aran mbok Indah. Temane: kebaya. Hang njuged mung wong enem naming hing ana hang nganggo kebaya naming minangka kadho kanggo tuan rumah digelar tari Jejer Gandrung lan aju ditambah tari Jaran Goyang. Werna biru elektrik lan kombinasi batik Gajah Oling kapuranta hang dienggo para penari katon seru meludhih, diiring gamelan hang diunekaken teka VCD. Isun ambi mbok Neeluh Hariyani hang asale teka Plampangrejo Cluring Banyuwangi nggawakaken tari Jaran Goyang. Masiya magih adoh teka ucap sampurna lan magih perlu akeh sinau maning taping cukup nggawe kaju ring penonton hang rata-rata magih lebih enom. Dene tari Jejer Gandrung digawa ring petang penari salah sijine muride penabuh kendhang hang uga maestro Banyuwangi, Kang Sabar. 
   Rasa mongkog lan rasa dihurmati tepak tim-e kene ngenalaken budaya Banyuwangi. Kekarepane, masiya kene ana ring boroan, tetep kepingin milu nguri-uri budaya Indonesia lan kesenian Banyuwangi ring mangsa pageblug hang durung uncal seru iki. Paran maning pemerintah Hongkong ngewajibaken tes swab kanggone buruh migran hang ana ring tengah-tengah tegal Victoria Park Causeway Bay merga ditemokaken ana satpam lan pitung wong Pakistan hang positip keneng covid. Hang penting kene tetep usaha kelendi carane awak tetep seger kelawan njaga protokol kesehatan utamane sak suwine ana ring panggonan hang ketekan wong akeh.

Lahan tepat untuk iklan anda di sini.

Hubungi: skb@belambangan.com atau WA telp 0811843457


Embuh sampek kapan pagebluge iki marek, muga-muga dulur-dulur hang golet rejeki kanggo nguripi keluwarga ring tanah kelairan ulih perlindhungan teka Hang Maha Kuwasa. 


Cheung Sha wan, 7-10-2021 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor