Arsitektur Masarakat Using Banyuwangi (Bagiyan 3)

Antariksawan Jusuf (dipublikasikan pada Selasa, 14 Oktober 2025 08:42 WIB)
- Opini

Arsitektur Masarakat Using (Bagiyan 3)
Ditulis ring Arif Wibowo

Umah Using ring Banyuwangi kadhung ditulih sak kelebetan lan jenis maceme umah Jawa miturut pembagiyan teradhisi arsitektur Jawa iku kelebu umah kampung.
   Tipe umah kampung kadhung miturut wong Jawa kulon iku umah kang umum ditemoni ring desa-desa lan kampung lan uga dipanggoni wong-wong biyasah utawa rakyat jelata.
   Mula kadhung kang dimaksud Jawa hang punjere Metaram, masarakat kebagi miturut kelas sosial lan ekonomi.
   Ring Jawa kulon antarane umahe priyayi beda ambi umahe rakyat jelata. Wong priyayi nganggo umah joglo lengkap sak pendhapane, sak walike rakyat biyasah umahe ya Umah Kampung.
   Beda ambi cara mikire (pandangan hidup) wong Belambangan hang sipate egaliter lan hing ngenal kelas sosial lan ekonomi, nganggep kabeh uwong padha sak derajat.
   Iki hang mbedakaken ambi tampilan arsitektur umahe.
   Umahe wong Using kadhung cara umume ya Umah Tikel. Iki nduduhaken kadhung kabeh uwong iku padha lan sing ana bedane endi hang sugih lan endi hang kurang mampu.
   Umah hang kaya modhel umah tikel ring Banyuwangi, uga akeh pisan ditemoni ring kutha liya utamane ring Jawa Tengah lan Jawa Timur.
   Aju paran bedane antarane umah modhel tikel hang ning Banyuwangi lan ring dhaerah liya?
   Kadhung dideleng akar budayane wong Belambangan hang asale teka budaya Jawa kawi, sing nutup kemungkinan pengaruh budaya egaliter lan sing ngenal kasta iku magih ana lan kesebar ring Jawa endi bain, sing mung nang Banyuwangi.
   Sak suwine lakune wayah saben-saben tinggalan artefak arsitektur umah iku merujuk karepe dhewek. Kaya dene umahe wong Using hang uga dipengaruhi paktor politik pisan sak mareke perang hang sing marek-marek ring wilayah Belambangan.
   Nggarahi ekspresi lan tampilan umahe ya katon ketutup utawa sing pati akeh cendhelane.
   Umah Using uga nduwe makna hang beda ambi umah Kampung miturut wong Jawa kulon kaya hang wis dijelasaken ring ndhuwur.

(Ana terusane)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.