Asal-Usul Iwuh Tumpeng Sewu
Antariksawan Jusuf (dipublikasikan pada Rabu, 12 Juni 2024 08:14 WIB)
- Laporan
Tepak dina Minggu 9 Juni sore, sak dawane dalan desa Kemiren Glagah ditutup merga ana upacara adat Tumpeng Sewu. Oncor diurubi. Wong-wong desa sak keluwargane padha ndheprok nggelar kelasa ring ngarep umahe dhewek ngadhepi panganan.
Hang mesthi ana ya sega tumpeng kelebu uba rampene kaya pecel pitik hang bengene metune mung tepak ana ritual-ritual gedigi, kuluban sak sambel rantine. Aju ana maneka macem jajan tradhisional.
Soren-sorene sedurunge tumpeng digelar, masarakat ngarak barong teka kulon lan wetan aju mandheg noring panggonan hang wis ditamtoaken.
Mari Magerib, ring balai desa ana pejabat-pejabat hang ngeresmekaken iwuhe. Aju sak marine acara seremonial, dalune ana Macaan Lontar Yusup hang mula ana kumpulane ring Kemiren.
Aju kelendi asal-usule Tumpeng Sewu lan sakat kapan?
Setemene, bengene iwuh iki minangka acara bersih desa, jare Ketua Adat Kemiren Pak Suhaimi.
Kepala desa wayahe Narik Pancen teka rakyate ring ulan Aji. Saben kepala keluwarga mbayar pipil hang nominale wis ditamtoaken aju dikongkon teka nyang umahe kepala desa, kaya wong kundangan. Tekane saben wong wis kedhaptar, aju dalune dianakaken macaan lontar sewengi njampleng.
Kanggo bersih desa, saben anggota masarakat nganakaken selametan kampung. Mulai sak lingkungan umah nganakaken selametan, dinane dhewek-dhewek, selametan sak lingkungan dhewek-dhewek, pokoke sak njerone ulan Aji.
Malah bengene, jare Pak Imik, tepak selametan merga dinane beda-beda bisa pating gentenan kirim-kiriman panganan.
Serta taun 2007 jamane Kepala Desa Haji Tahrim kerana Narik Pancen wis hing ana, aju selametane hang dhewek-dhewek dinane mau lan manggon ring teras umahe dhewek-dhewek, didadekaken siji. Lan panggonane dipindhah ring pinggir lurung. Wong-wong hang umahe nong njero padha nggawa tumpenge ring pinggir lurung.
Merga jumlah pendhudhuke tepak iku ana 1100 KK, lan saben KK nggawa sak tumpeng, aju diarani Tumpeng Sewu.
Paran maning sakat Kemiren dadi desa wisata, malah didadekaken pestipal lan kesepakatane dianakaken ring dina Minggu utawa dina Kemis minggu kawitan ring ulan Aji.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
