Bab Buku, Indonesia Nomer 9 Sak Donya

Antariksawan Jusuf (dipublikasikan pada Selasa, 25 November 2025 05:04 WIB)
- Laporan

Bab Nerbitaken Buku, Indonesia Nomer 9 Sak Donya

Hing kaya kabar elek hang kerep seliweran, Indonesia cumpune kelebu 10 negara paling akeh terbitan bukune sak donya.
   Drs. Supriyanto M.Si. Kepala Pusat Bibliografi dan Pengolahan Bahan Perpustakaan, ngomong Indonesia lumayan akeh nerbitaken buku nganggo ISBN kadhung dibandhingaken ambi negara liya sak donya.
   Teka 65 negara hang dicathet paling akeh terbitan ISBNe yaiku nomer siji Amerika, aju Jepang, Korea Selatan, India, Jerman, Brazil, Inggris, Itali, Indonesia lan Polandia.
   Pak Supri ngomong ring acara hang digelar Balai Bahasa Jawa Timur yaiku Diseminasi Dan Peluncuran Produk Terjemahan Tahun 2025 ring Hotel Mercure Grand Mirama Surabaya dina Senin 23 Nopember.
   Ring data hang ditulis ring World Intellectual Property Association taun 2023, ana 6,5 juta ISBN sak donya lan Indonesia ngetokaken 107.856.
   Dene kanggo penulis lan sapa bain hang arep golet ISBN, Pak Supri njelentrehaken sarat ngurus ISBN saiki yaiku ngajokaken surat nang Perpusnas hang dilampiri:
1. Surat pernyataan Keaslian karya. Kadhung bareng-bareng cukup penulis hang tulisane metu kawitan ring buku.
Surat iki dienggo penulis utawa penanggung jawab terbitan. Tujuwane mastekaken gok iku tulisane dhewek lan ngurangi plagiarisme. Uga nduduhaken gok bukune iki mula siyap terbit. Dadi bisa dienggo rujukan kadhung ana masalah hukum ring tembe buri.
2. Kepemilikan nomor induk berusaha (NIB). Kadhung perorangan dikongkon golet penerbit hang bisa ngurus.
NIB iki bisa diduweni penerbit, produsen karya rekam, instansi pemerintah, perguruan tinggi lan badan hukum.
3. Dummy buku. Kelendi wujude bukune, kawit samak, pengantar, daptar isi lan isi bukune lengkap. Sarat liyane, buku paling sithik 49 halaman.
4. Link buku. Samak ngarep lan keterangan pelengkape wis dipajang nong web penerbit.
5. Kebijakan kategori buku. Nduduhaken isi buku teka halaman judhul, halaman judhul lengkap, halaman KDT (Katalog Dalam Terbitan), isine, lan bagiyan pungkasan arupa daptar pustaka, lampiran, glosari, indeks lan biografi penulis.
6. Kewajiban penerbit: nyerahaken buku bukti cetak rong eksemplar kanggo Perpusnas lan sak buku kanggo Perpusda propinsi. Kadhung kewajiban iki hing digatekaken, mengarepe bisa dadi bahan pertimbangan kanggo ngetokaken ISBN.
   Kadhung ana buku hang arep dijalukaken nomer ISBN, bisa kanggo e-book, buku cetak lan buku audio, idine dhewek-dhewek, naming bisa dijalukaken bareng.
   Surat ajuan ISBN bisa ditolak merga:  Surat Keaslian Karya hing nganggo format hang wis standar, durung ana aran penulis lan liyane, laporan penelitian lan laporan lembaga hang distribusine terbatas.
   Sak Indonesia, hang ngajokaken ISBN sakat 2020 rata-rata ana 100.000an. Taun 2020 (144.792), 2021 (159.325), 2022 (107.856), 2023 (108.218), 2024 (118.157), lan taun 2025 (111.410).

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.