Beasiswa Progresif Kanggo Lalare Banyuwangi
Antariksawan Jusuf (dipublikasikan pada Jumat, 13 Maret 2026 06:03 WIB)
- Laporan
Dienggo nguwataken layanan masarakat (publik) utamane ring sektor kesehatan, Bupati Banyuwangi Ipuk Fiestandani nggentengaken beasiswa “Banyuwangi Progresif (B-Pro)” kelawan ngutamaaken dokter spesialis lan jurusan kesehatan.
Masiya gedigu tetep dibukak kanggo jurusan perkuliyahan liyane miloni kebutuhan dhaerah.
Beasiswa Banyuwangi Progresif diuwakaken nyang mahasiswa hang magih aktip kuliyah minimal semester telu.
Pendhaptaran beasiswa taun kuliyah 2027 dibukak mulai ulan April 2026.
“Program beasiswa iki mbantu putra-putri Banyuwangi hang saiki ngelakoni pendidikan tinggi, utamane lalare hang kuliyah ring jurusan kesehatan lan kedokteran. Naming tetep ana kanggo jurusan liyane,” jare Ipuk.
Ipuk ngomong gok beasiswa Banyuwangi Progresif saiki mula diutamaaken kanggo pendidikan kesehatan lan utamane dokter spesialis, merga ndeleng kebutuhane dhaerah.
Ana 12 jurusan kanggo dokter spesialis hang ditawakaken, antarane spesialis Jantung, Syaraf, Urologi, THT, Orthopedi dan Traumatology, Penyakit Dalam, Fisik dan Rehabilitasi, Kedokteran Jiwa, spesialis Mata, Bedah Mulut dan Maksilofasial, dokter gigi spesialis Konservasi Gigi, dokter gigi Spesialis Bedah Mulut dan Maksilofasial.
“Liwat beasiswa iki diarepaken akeh dokter spesialis hang mbisuke ngisi pasilitas kesehatan ring Banyuwangi, kanggo ningkataken pelayanan kesehatan masarakat,” ujare Ipuk.
Seliyane dokter spesialis uga dibukak kanggo jurisan kesehatan liyane kayata Apoteker, Ahli Gizi, Ahli Sanitasi, Bidan, uga Perawat.
“Husus kanggo bidan, perawat lan apoteker, kene ngutamaaken kanggo wong-wong hang mbisuke gelem ngabdi nyang dhaerah wates paling njaba Banyuwangi. Mulane kene ngajak mahasiswa hang asale teka dhaerah iku milu ndhaptar lan dadi prioritas,” ucape Ipuk.
B-Pro uga ngewani beasiswa nyang mahasiswa teknologi Produksi Tanaman Pangan, Teknik dan Infrastruktur, Ekonomi Kreatif dan Pariwisata, Pendidikan, lan Ilmu Sosial.
Ditambahi nyang Plt. Kepala Dinas Pendidikan Alfiyan, beasiswa Banyuwangi Progresif disedhiyakaken kanggone warga Banyuwangi. Mbisuke sakuwise marekaken pendhidhikan, hang nampa beasiswa mauka wajib balik ngabdi ring Banyuwangi, sakusinge ping pindhone wayah ulih beasiswa ditambah setahun.
“Komponen beasiswane yaiku Uang Kuliah Tunggal (UKT), biaya hidup, biaya buku, biaya riset, peraktik. Beasiswa hang diuwakaken sakat lolos seleksi sampek lulus pendhidhikan semester 12 kanggone fakultas kedokteran lan semester 8 kanggone jurusan liyane,” jelentrehe Alfiyan.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
