Beda Pathokan Kencenge Kabah ring Masjid Baiturrahman
Antariksawan Jusuf (dipublikasikan pada Senin, 29 Desember 2025 06:55 WIB)
- Laporan
Beda Pathokan Kencenge Kabah ring Masjid Baiturrahman Banyuwangi
Kawitane jujugan rombongan jiaroh makam kiyai teka Pembina Yayasan Masjid Agung Baiturrahman (YMAB), Pengurus YMAB, Pengurus Takmir MAB nyang komplek pemakaman KH. Syamsuri mburine RSUD Belambangan Banyuwangi. Nerusaken lakon nyang komplek pemakaman KH.Harun, KH.Syafii lan KH. A.Makshum Syafii Ponpes Darunnajah Kel.Tukangkayu.
Tokoh kyai gedhi ring jamane, KH.Syamsuri lan KH.Harun tau bida pathokan masalah ngadhepe sembahyang ring Masjid Jamik hang saiki dadi Masjid Agung Baiturrahman Banyuwangi.
Antarane ruang utama masjid ambi panggonan sembahyang ring enggir kidul bida.
Nalika ana pemugaran masjid, adhepe hang kenceng ring Kabah yaiku hang ring iringan kidul ruang utama. Wujud iku cocog ambi kekarepane KH.Syamsuri hang mula duwe fak ilmu Falak.
Dudu Panitiya pembangunan mbela kekarepane KH. Syamsuri, using. Panitiya uga nganggo alat-alat canggih kaya dene kompas.
"Alhamdulillah, belegerane Masjid Agung Baiturrahman (MAB) saiki uwis kenceng nyang erah-rahe Kabah ring Mekkah," abane Pembina Yayasan MAB, Ir. Iwan Azis Siswanto hang tahun 2005 bengen uga dadi panitia aktip pembangunan MAB hang Sabtu (27/12) milu rombongan jiaroh makam para kyai ring wilayah Kec. Banyuwangi, Giri lan Kalipuro.
Mari jiaroh ring makam ruwahe KH. Harun, KH. Syafii lan KH. Ahmad Ma'shum Sayafii nerusaken jiaroh nyang makam al-hafidz KH. Wahid sak wetane kampus UNIBA Kertosari. Acarane padha ngaji lan ndonga.
Teka Kertosari nerusaken lakon nyang kuburane Mbah Mas Saleh, hang taun 1880-an dadi imam besar kawitan masjid jamik Baiturrahman. Rombongan aju nerusaken jiaroh nyang makam keramat Datuk Abdurrohim Bauzir aju nerusaken laku nyang makame KH. Sholeh.
Sekira ngarepaken wayah bedhug rombongan nerusaken nyang Kerantigan, jiaroh nyang ruwahe almaghfurullah KH. M. Bisri bin KH. Abu Amar, KH. Muchlas Bisri lan makam Mbah Kyai Zen hang uga kesebut Mbah Buyut Syargi.
Nalika uripe sekira taun 1850-an gedigu, kerep ditekani anak-anake para bangsawan Banyuwangi kaya dene Mas Pringgo Kusumo, Mas Saleh lan Mas Sailan kanggo ngelmu. Mari kirim donga, rombongan nerusaken lakon nyang Penataban kanggo jiaroh ring makame KH. Wahab lan KH. Zawawi Wahab, nerusaken maning nyang Langring kanggo jiaroh ring makame KH. Muhtadi. Ring Langring rombongan rada koled ulihe ngaso merga akeh hang padha adus lan sembahyang bedhug. Sak marine iku aju nerusaken puput lakon nyang Kelir, jiaroh ring makame KH. Muslih Anwar bin Jayadi. Pungkasan jiaroh nyang Kalipuro, kirim donga kanggo KH. Hasan Abdullah hang makame ana tengere pendhera merah putih lan ana uneke Pejuang. Kerana uwis melebu jam telu soren, rombongan hang maune uga njadwal jiaroh nyang Ketapang, yaiku ring makame KH. Samsul Muarif lan KH. Kaprawi, wurung.
Sedina sedurunge ngepasi malem Jemuwah (25/12) ring ruang utama Masjid Agung Baiturrahman dianakaken pengajian hajat, nekakaken juru nasihat teka Solo yaiku KH. Muhlisin Dawam. Ring jerone nasihat, ngarep-arep umat Islam Banyuwangi kudu pinter-pinter njaga urip hang imbang antarane urusan donya lan ahirate. Sawetara iku Bendahara Yayasan Masjid Agung, Istupik, S.Com nalika ngewakili ketua yayasan hang ngepasi lara, nyampekaken kadhung anane agenda kegiyatan iku kanggo nggugah semangat ibadah lan kanggo nambah makmure ibadah ring masjid agung.
(Kang Ujik)
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
