Carita Lan Ceritane ring Mutiara Carita Cottages

Antariksawan Jusuf (dipublikasikan pada Selasa, 17 September 2024 09:37 WIB)
- Laporan

Carita lan Ceritane ring Mutiara Cottages

Pesisir Carita kanggone wong Jakarta wis kesuwur suwi minangka dadi papan jujugan kelenceran. Kadhung metu teka tol Cilegon Timur, ngeliwati kutha Cilegon, aju ngeliwati dalan anyar Lingkar Selatan, aju sak dawane kira-kira 50 kilo ngidulaken dalane ana ring pinggir pesisir. Hing maido akeh panggonan kelenceran liyane kayata pantai Anyer, pantai Karangbolong aju nggadhug ring Carita.
   Isun takon nang hang duwe Mutiara Carita Cottages (MCC), Pak Budi Mranata wong Banyuwangi, Doktor Ilmu Biologi lulusan Jerman, hang saiki manggon ring Jakarta lan dadi salah siji penasihate Ikawangi Pusat, cerita sithik bab Carita.
   Cumpu sak liyane dadi jujugan kelawan statuse hotel bintang papat, MCC nyimpen panggonan hang akeh ngemu sejarah.
   Salah sijine yaiku Sumur Siti Guru. Dipercaya sumur iki wis dibangun sakat 200 taun kepungkur. Wis sakat bengen sumur iki hing tau asat. Masiya adohe teka pesisir mung 100 meteran, banyune hang nyumber banyu tawa.
   Apuwa diarani Siti Guru? Ring  jaman penjajahan Landa taun 1838 merga pintere, Siti diidini ambi Landa mbukak sekolahan kawitan ring Carita.
   Merga kepinterane iku iyane kerep dijaluki tamba ambi masarakat kono.Bu Siti Guru kerep nganggo banyu sumur iku minangka sarate.
   Suwi-suwi, kaya dene mitos-mitos liyane, masarakat percaya gok banyu sumure bisa nggawe seger lan nggawe wong awet enom.
   Saiki sumure dibangun, ring tembok sak ubengane ditempleki keramik-keramik biru putih.
   Ceritane, ring parek sumur kono ana telaga cilik hang disebut Danau Kembar. Bengene mung sukur lemah rawa hang kerep dienggo ngguyang kebo ambi masarakat. Merga banyune ya hing tau asat, rawa iki dijugeri.
   Hing weruha, ring ngingsore ditemokaken pecahan-pecahan keramik hang sebagiyan dipajang ring sumur Siti Guru, picis kenthing jaman Landa lan kima (kerang buta) hang gedhene bisa sampek semeter lan abote atusan kilo lan umure bisa atusan taun. Kerang kimane uga dipajang ring pinggire telaga kono. Kerang kima iki uripe ring segara hang banyune kening.
   Dadi seliyane sumber banyu tawa, nawi bengene MCC iki segara hang kening banyune lan tau ana kapal Landa hang kelem.
   Masiya ring pinggir pesisir, hawa ring MCC hing ngelangub lan nggawe kulit riket. Wit-witane mula akeh, dhuwur-dhuwur lan gedhi-gedhi. Jare Kang Bambang Irianto, lare Ketapang Banyuwangi hang dadi direkture ring kono, malah akeh wong hang dhemenane ndeleng manuk (bird watching), kadhang merono kanggo ndeleng manuk engguk lan kukang Jawa hang akeh sengidan ring bolongan-bolongan wit weringin ring kono.
   Taping jare Pak Budi hawane iki hawa gunung hang ngelibengi Carita. Ana gunung Aseupan lan gunung Kapur. Dadi mula enak hawane.
   Sakjege keneng tsunami kapanane, kira-kira 50 meter teka hotele iki mau dibangun penahan ombak hang uga dadi sasak kanggo pengunjung ndeleng konservasi penyu hang dibangun ring pucuke sasak mau.
   Ana kolam hang diiseni penyu-penyu hang kejaring nelayan. Kadhung wis seger penyune iku mau dibalekaken nang segara.
   Ana pisan ring karang-karang hang ana ring pesisire kono, dienggo wong hang golet tamba. Wonge selulup nang banyune kono aju mareke dipijeti punuke ambi wong kono. Embuh wis ceritane seteruse kelendi.
   Dadi kapan nong Carita?

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.