Cathetan Juri ring Lomba Memengan Sandhiwara Using Taun 2024

Moh. Syaiful (dipublikasikan pada Rabu, 06 November 2024 08:37 WIB)
- Laporan

Peserta Lomba Festival Literasi Using cabang “Memengan Sandhiwara” taun iki pesertane mudhun. Mung ana 21 akehe peserta hang makili Sekolah Dasar (SD) hang ana ring kecamatan-kecamatan wilayah Kabupaten Banyuwangi.

Magih akeh peserta hang sing mikir nyang bab anane setting panggung. Alihe Lomba Memengan Sandhiwara iki saktemene sing adoh teka teater utawa derama, mula iku mbangun suwasana teka panggung iku seru pentinge makene penonton bisa kegawa nyang alur cerita. Umpama ceritane iki cerita lare memengan nong sawah mesthine setting paglak lan penyawangan sawah lan gunung-gunung bisa nggawa lakon nyang atine penonton. Paran maning magih nambahi ambi ilustrasi musik kaya dene suwara banyu utawa suwarane manuk seru dadi apike.

Ring kana lan kene magih akeh kelebon basa liyane umpamane Basa Jawa. Saktemene panitiya ring Pertemuan Teknis hang dianakaken sedurunge wis nguweni panggonan kanggone basa serapan hang magih durung ana ring Basa Using, umpamane “viral” dadi piral kadhung diserep dadi Basa Using. Naming iku dudu berarti kanggo basa liya hang nong Basa Using wis ana. Kaya umpamane “gelut” (Basa Jawa) bisa diganti pulet utawa tukar, gedigu ujare Kang Iwan Rohmatudin hang dadi salah sijine juri wakil teka DKB (Dewan Kesenian Blambangan)

Manggon ring aula terbuka Banyuwangi Creative Space kanggo lomba iki mesthine ya kurang tepak, gedigu keterangan Aden Syahlana hang uga dadi juri ring Lomba Memengan Sandhiwara iki. Merga lomba sandhiwara hang wujud derama iki kudune manggon nong panggonan hang trep nyang urusan suwara, mula iku sing ulih keganggu suwara-suwara liya kaya dene suwara penonton lan suwarane montor hang pating seliweran ring lurung.

Aden Syahlana hang uga dadi seniman teater Banyuwangi iki nyatakaken kaju nyang peserta lare cilik-cilik hang wis pinter main derama. Paran maning deramane iki nganggo Basa Using. Iki sing gampang, gedigu Aden nyatakaken ring meja juri sakdurunge ngumumaken pemenang.

Iwan Rohmatuddin hang kedhapuk dadi Juri 2 nyatakaken kadhung peserta taun iki kuwalitase mudhun timbang hang taun kepungkur. Endane merga kecamatan-kecamatan basis Using akeh hang sing milu iku. Kecamatan Rogojampi hang langganan juwara taun iki sing milu, Kecamatan Glagah basis Using uga sing milu, Kecamatan Blimbingsari lan Kecamatan Licin uga sing milu. Mesthine iki ya dadi galure mudhun kuwalitas pagelarane.

Moh. Syaiful nguweni apresiasi hang sak dhuwur-dhuwure nyang Pemda Banyuwangi liwat Dinas Pendidikan Banyuwangi hang wis nggawe kegiyatan “Festival Literasi Using” iki. Modhel Memengan Sandhiwara iki seru kenthel literasine merga jangkep kabeh ana, kayadene visual, verbal, motoric lan liya-liyane ana kabeh. Pokoke kolaborasine kuwat ring akeh bidhang kaya dene hang dikarepaken ring Kurikulum Merdeka yaiku anane pembelajaran model diferensiasi.

Magih akeh skenario hang durung bener. Kudune guru hang dadi penulis naskah ya kudu ngarteni bab penulisan Basa Using hang bener. Merga guru-guru SD iki wis koncar-kancir milu pelatihan nulis hang dianakaken guru-guru Basa Using Kabupaten Banyuwangi. Ring kene wis dianakaken penghargaan Naskah Terbaik utawa Skenario Terbaik mesthine penulisan ring Basa Using wis kudu lanyah.

Sakteruse Koordinator juri iki njelasaken dhung magih akeh penulisan hang ana ring naskah sandhiwara penulisan basane durung kaya hang ana ring Ejaan Basa Using hang bener lan sing padha ambi Kamus Using-Indonesia gawenane pak Hasan Ali. Kudune guru hang dadi penulis naskah ya kudu ngarteni bab penulisan basa Using.

Mula iku, kegiyatan kaya gedigi iki bisa diterusaken ring taun ngarep kelawan persiyapan hang mateng lan mugen. Hasan Basri Ketua DKB nyatakaken arep gancang evaluasi ambi Dinas pendidikan kanggo ngelaksanakaken taun ngarep makene bisa apik maning. Sambutan kang apik teka Ketua DKB iki gancang ditampa ambi Kasi – SD Dinas Pendidikan Kabupaten Banyuwangi, kepingin ngawiti kegiyatan iki taun ngarep nganggo Bimtek nyang guru-gurune makene kabeh ulih pemahaman sulung nyang babakan Sandhiwara Using.

Dene hang dadi juwara lan ulih penghargaan ring Memengab Sandhiwara iki yaiku kecamatan Srono ulih juwara 1 lan penghargaan Penata Artistik Terbaik, Kecamatan Kabat ulih juwara 2 ambi penghargaan Sutradara Terbaik, lan Pemeran Utama Wanita Terbaik lan Pemeran Utama Pria Terbaik, Kecamatan Banyuwangi ulih juwara 3, Kecamatan Sempu ulih juara Harapan 1 lan Penata Musik Terbaik lan Kecamatan Cluring ulih juara Harapan 2.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.