Cumpleng Hang Nggarahi Kumpleng
Antariksawan Jusuf (dipublikasikan pada Rabu, 26 November 2025 06:19 WIB)
- Laporan
Cumpleng hang Nggarahi Kumpleng
Kadhung ana cumpleng hang nggarahi kumpleng ya dina iku tepak lalare gendheng teka Bisindo (Kelompok Bahasa Isyarat Indonesia) munggah genjot main derama nggawa cerita kanggo lalare.
Ceritane dijuwut teka buku karyane lare Banyuwangi Andi Sep Kurniawan hang nduweni judhul: Siji, Loro, Telu...Tarik.
Buku iku salah siji teka 13 buku basa Using-Indonesia lan teka 123 buku cerita kanggo lalare nganggo basa Jawa-Indonesia, Medura-Indonesia lan Using-Indonesia hang diterbitaken lan dipeleciraken ring Balai Bahasa Jawa Timur (BBJT).
Sakat taun 2021 BBJT wis nerbitaken 375 buku cerita lalare, kelebu puluhan judhul hang nganggo basa Using.
Ring dhuwur genjot, lalare Bisindo mau ana hang dadi narator, nyeritakaken nganggo basa isarat kedadeyan paran hang ana ring genjot. Lare papat liyane dadi bapake Riska, emake Riska, Riska lan kancane Riska.
Lare wadon arane Riska (nong cerita bukune setemene lare lanang) keluwargane wong nelayan ring Wongsorejo. Bapake ngerawati wit lembulung hang dicancang ring tengah segara.
Anake kepingin milu bapake merga kepingin weruh wite lembulung hang saben-saben iyane mangan digawekaken emake.
Aju ana cerita pisan lare wadon hang dhemen mbuwang romot pelastik nong pesisir. Hing weruh gok romot iku nggarahi kothor lan ngerusak kebon lembulung.
Ambi bapake, anake dikongkon rijig-rijig romot nong pesisir makene hing ganggu uwite lembulung merga segarane kothor.
Pungkasan, Riska ambi kancane diejak bapake nunggang perahu lan milu narik dhadhung hang muket wit lembulung. Siji...loro...telu...tarik. Riska girang bisa nulungi bapake lan weruh wite lembulung.
Tepak narasi utawa dialog antarane pemain, hing ana unine musik latar mburi, mung disusul suwarane penerjemah, wong hang bisa ngucap biyasah, hang macakaken basa isarat teka narator utawa pemaine.
Bangete nganteni basa isarat, sampek dadi sak ucap sak kalimat, hing ana suwara paran-paran, cumpleng. Cumpleng hang nggarahi kumpleng.
Kira-kira 10 menit deramatisasine marek. Penonton padha keplok.
Cerita hang ditulis ring buku dadi cerita hang rame ring antarane lalare hang hing bisa rungu. Lalare gendheng. Lalare hang urip minangka bagiyan teka lare-lare hang ngarteni cerita-cerita hang ditulis dienggo lalare. Teka carane gesah, ndeleng ubahe deriji lan tangane, ekspresi rai lan sorot matane, setemene donyane lalare iki rame masiya nong kupinge dhewek kerasa cumpleng.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
