Endhog-Endhogan lan Ancakan ring Ikawangi Tangerang Selatan
Antariksawan Jusuf (dipublikasikan pada Selasa, 01 Oktober 2024 08:03 WIB)
- Laporan
Endhog-endhogan lan Ancakan ring Ikawangi Tangerang Selatan
Madhang kembulan nong ancak lan endhog-endhogan adat Banyuwangi njumbul ring iwuh mengeti Maulid Nabi Muhammad SAW hang digelar Ikawangi Tangerang Selatan.
Iwuh Muludan Minggu (29/9) iku hing kaya biyasahe hang dilakoni Ikawangi Tangsel nekakaken kiyai lan ngundang wong-wong Ikawangi sak Jabodetabek, sore iku mung ditekani anggota Ikawangi Tangerang Selatan. Dianakaken ring umahe
bendahara mbok Anita ring kompleks BSD, Muludane masiya cilik kerasa seru guyube.
Penceramah hang biyasahe kiyai (taun sore ngundang KH Abdul Goffar teka Banyuwangi, diisi anggota dhewek yaiku kang Ismadi.
"Kanjeng Nabi dilairaken nong donya iki dadi Nabi lan Rosul, kelawan tuntunan agama kanggo nggawa perdamaian lan mbecikaken ahlake menungsa," jare Kang Ismadi. Iyane iki asale teka Sumberberas Muncar lan lulusan teka sekolah ring Pesantren Minhajut Thulab mBerasan "Mangkane hang penting teka menungsa iku ahlake hang apik," jare Kang Ismadi.
Dene adat Banyuwangi endhog-endhogan dikenalaken ambi ruwahe Kiyai Abdullah Faqih, Cemoro, Songgon.
Endhog hang dihiyas renggaan kertas kembang werna-werna lan ditancebaken ring gedebog gedhang iku ring Banyuwangi dadi dhemenane lare-lare tepak Muludan. Endhog hang telung lapis, kulite, putihe lan kuninge dilambangaken teka Islam, Iman lan Ihsan.
Dene kembulan utawa mangan kembul iki minangka teradhisi wong Indonesia, macem-macem arane lan saranane. Ana hang sak lonjor godhong wutuh digelar lan didelehi panganane. Hang madhang adhep-adhepan. Pirangane desa liyane nganggo talam wera, aju kembulan melibengi talam.
Ring Banyuwangi biyasahe nganggo ancak, papah gedhang hang ditekuk-tekuk sampek wujud persegi aju disunduki jajang. Ring ndhuwure dilemeki godhong lan dipangan wong papat.
Kembulan iki nduduhaken sipat gotong royong, rukun lan nggendhong indhit, guyub sak seduluran. Paran maning kadhung wong Banyuwangi, kadhung wis kecaruk wong Banyuwangi liyane ring tanah boroan, wis nyedulur. Wis dadi kaya dulur.
Cuma hang rada uwah ring ancak-ancakane sore iku, ancake dilemeki pelastik lan wong hang madhang perei wisuh merga panitiya nyedhiyani selongsong tangan pelastik.
Hang penting guyube saya katon.
Teradhisi kembulan iki saya suda ring masarakat, taping pirangane panggonan mangan malah ngenalaken menu kembulan. Gondhong gedhang digelar ring meja, panganane disiyapaken nong ndhuwure. Kabeh madhang kembul lan ngengetaken gok masarakate dhewek iki guyub lan paran-paran disangga bareng.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
