Gendhing Anyar Basa Using Kanggo Lalare: Layangan
Antariksawan Jusuf (dipublikasikan pada Selasa, 13 Februari 2024 08:26 WIB)
- Laporan
Paguyuban Sengker Kuwung Belambangan (SKB) meleciraken siji maning gendhing basa Using kanggo lalare Banyuwangi: Layangan.
Gendhing hang nomer enem sakwise gendhing liyane yaiku Enake, Sekolah, Pari, Woh-wohan, Ajar Ngitung, gendhing Layangam Layangan bisa dideleng ring youtube channel TV Bain.
Gendhing-gendhing hang ana ring TV Bain dikarepaken bisa nyugihi pilihan gendhing basa Using hang sing pati akeh. Ngenes ndeleng Banyuwangi, hang kesuwur gendhing-gendhing tradhisionale wis ngambah ngeliwati tepis wiring geograpi, taping hing nduwe gendhing tradhisionale kanggo lalare ring sekolah TK lan SD.
Paran maning, wis limang taun iki Pemda Banyuwangi nggelar lomba gendhing Using. Kepaksa panitiya nggolet gendhing hang setemene kanggo wong-wong gedhi taping magih aman kanggo lalare kayata gendhing Bang Cilang Cilung, Layangan hang digawakaken ambi Catur Arum. Merga aja sampek kebelasuk, kaya ceritane sastrawan lan pengarang gendhing tradhisional ruwahe Pak Andang C.Y. hang tau dikongkon dadi juri lomba nyanyi anak-anak, naming pilihan gendhinge Bokong Semok kang sing pesadu kanggo lalare.
Gendhing Layangan hang diproduksi SKB, ngenalaken maceme memengan lalare Banyuwangi tepak usum ketiga. Gambare layangan aduan macem-macem: palang, cundhuk, kop-kopan lan sawi-sawian. Ana pisan hang arupa layangan hias: iwak-iwakan, payung-payungan lan suwangan.
Naming minangka gendhing hang ngemu pelajaran, ana uga wekas kanggo lare-lare kudu ati-ati kadhung memengan, aja sampek nerotos dalan hing nulih kiwa tengen ring dalan (biyasahe kadhung tepak ngejer layangan pedhot). Uga kudu ngati-ati kadhung memengan layangan aduan hang mesthine nganggo bolak gelasan. Bolake landhep bisa mbeleri tangan.
Iki lirike:
LAYANGAN
layanganisun anyar
ulihe tuku ring pasar
ana cundhuk, sawi-sawian
ana palang lan kop-kopan
Isun duwe layangan hias
Iwak-iwakan kelire abang
ijo bunder payung-payungan
bisa muni layangan suwangan
reff:
amening kadhung menganan
aja nerotos kadhung ring dalan
amening bolak gelasan
mbelaheni mbeler tangan
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
