Kemah Cerpen Kanggo Generasi Emas
Antariksawan Jusuf (dipublikasikan pada Sabtu, 23 November 2024 08:10 WIB)
- Laporan
Kemah Cerpen basa Medura lan basa Using dikarepaken saya nggawe lalare dhemen nang basa dhaerahe.
"Muga-muga kelawan anane acara iki basa Medura lan basa Jawa dialek Using ndadekaken lalare tetep welas nang basa dhaerahe. Sebab generasi iki hang engko dadi generasi emas mengarepe," jare Ibu Dr. Umi Kulsum, Kepala Balai Bahasa Propinsi Jawa Timur (BBJT) tepak mbukak iwuh Kemah Cerpen hang kaping pindho ring Hotel Platinum Surabaya.
Kemah Cerpen hang kepindho digelar iki dienggo lalare hang wis juwara ring Festival Tunas Bahasa Ibu 2024.
Kabeh cerita asile teka Kemah Cerpen periode siji lan loro arep didadekaken buku lan diterbitaken ring BBJT.
Lalare Banyuwangi hang milu ring Kemah Cerpen kepindho iki yaiku Mafrida Aulia Zahra (SMPN 5 Banyuwangi), Elvira Adrlia Zahra (SMPN 2 Srono), Ferlin Anisah Turrohmah (SMPN 1 Singojuruh), Rahma Sekar Ayuningtyas (SMPN 4 Banyuwangi), Qonita Ruby Humayra (SDN 1 Kabat), Marisa Safa Azahra (SDN 1 Jambesari), Jesika Maulidyah (SDN 3 Tamansuruh).
Hang milu ring Kemah Cerpen 2 cumpu wadon kabeh. Hing mung hang teka Banyuwangi naming uga hang teka wilayah kabupaten liya yaiku Sumenep, Pamekasan, Sampang, Bangkalan, Situbondo lan Bondowoso. Saben Kabupaten hang nganggo basa Medura iku ngirim telung lare, dadi jumlahe ana 18 (SMP, SD 1), tambah 7 teka Banyuwangi.
Lalare iki wis milu saringan sedurunge ring Revitalisasi Bahasa Daerah taun 2024. Hang wis ulih juwara siji arep digawa ring selebrasi FTBI tanggal 22 Februari 2025.
Ring iwuh Kemah Cerpen sedurunge yaiku ulan Oktober sore ana 10 lare Banyuwangi hang milu, lima teka SD lan lima teka SMP. Lalare iki hang milu ring FTBI 2023.
Kabeh cerita asile teka Kemah Cerpen periode siji lan loro arep didadekaken buku lan diterbitaken ring BBJT.
Bukune engko arep disebar liwat dinas lan dikarepaken bisa dadi materi hang nyugihi produk literasi kanggo lalare.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
