Komunitas Munsing Milu LOKOVASIA 2024
ALIF MAULANA (dipublikasikan pada Sabtu, 31 Agustus 2024 11:02 WIB)
- Laporan
Ring Kementrian Pendidikan, Kebudayan, Riset, dan Teknologi (Kemendikbudristek), Direktorat Jenderal Kebudayaan, DIrektorat Perfilman, Musik, dan Media, hang megawe bareng ambi Yayasan Musike SJ nganakaken kegiyatan LOKOVASIA 2024 yaiku Lokakarya Konservasi dan Inovasi Musik Tradisi Indonesia taun 2024 hang puncak acarane ring tanggal 8 September 2024 manggon ring Universitas Negeri Malang. Ring acara iku ana 10 Grup musik, 3 komponis, 2 peneliti musik, lan 5 musisi hang wis kepilih utawa dikurasi ambi panitiya. Salah sijine 10 grup iku, perwakilan teka Banyuwangi ana hang melebu yaiku Komunitas Munsing teka Aliyan Rogojampi hang dipandegani Moh. Pungki Hartono utowo Pungki, lare alumni teka Sekolah Tinggi Karawitan Wilwatikta Surabaya (STKWS) hang saiki dines dadi guru pelajaran seni budaya ring SMPN 1 Rogojampi. Peserta liyane hang kepilih ana hang teka Tanah Datar, Bengkulu, Bangka Belitung, Bandung, Bogor, Cimahi, Sumedang, Yogyakarta, Sukoharjo, Wonogiri, Tulungagung, Surabaya, Madura, Malang, Badung, Palangkaraya, Flores, Manado, uga Banyuwangi.
Komunitas Munsing salah sijine grup teka Kabupaten Banyuwangi hang melebu kurasi teka judul garapan Kidung Lontar karyane Pungki hang wis kesuwur dadi komposer ring acara-acara gedhi kaya mengeti sewu abad NU hang manggon ring Stadion Diponegoro Banyuwangi sabene nampilaken Rebanana (Musik Terbang Klasik Banyuwangi) hang pesertane meh sewu. Liyane iku uga tau dadi komposer ring acara Warisan Budaya Tak Benda hang manggon ring Taman Budaya Museum Mpu Tantular Sidoarjo bareng ambi Komunitas Munsing hang dadi musisine.
Kegiyatan LOKOVASIA 2024 iki dadi ajang ngumpule seniman musisi/komposer/penata musik sak Indonesia hang wis kepilih uga dadi kegiyatan gawe ngolah pikiran lan kreatipitase seniman merga acara iku para seniman dikongkon golet inovasi hang bisa dadi inspirasi kanggo musik tradisi ring Indonesia hususe ring dhaerah-dhaerah dununge tradhisi iku.
Ring kegiyatan LOKOVASIA 2024 iki, Komunitas Munsing adeg judhul karya Kidung Lontar hang ring njerone ngangkat macaan pacul gowang yaiku tradhisi macaan Banyuwangian. Sak njerone iku ring rentetane macaan ana Ngelontar (Maca Lontar Yusup), Kesilir, Paculan uga jugedan guyonan hang dipimpin badhut ring njerone tradhisi macaan. Bengen tradhisi macaan iki diarani Aljin merga hang mandegani arane Aljin. Tradhisi iki wis emeh sing ana merga tuwek-tuwekane wis padha entek umur kaya Misran, Jubaidi, lan Katirin hang kesuwur sakat bengen merga tradhisi macaan pacul gowang.
Alat musik hang digawa Komunitas Munsing iki ana salah sijine inopasi hang sing biyasah dienggo ring kesenian macaan yaiku nganggo Gentulitan yaiku saron hang digawe teka jajang lan ditabuh nganggo tabuhe angklung loro. Alat sijine nganggo gong hang sing kaya biyasahe. Gong hang digawa Komunitas Munsing iki ana lima macem, gong gedhe loro lan gong cilik (kempul) telu. Gong gedhe diadekaken adhep-adhepan nganggo cagak teka jajang, kadhung kempule diturokaken nganggo cagak wesi cilik ring ngisore kempul. Hang nabuh semono uga sing mung tabuh siji, taping nganggo tabuh loro. Alat-alat liyane hang digawa yaiku kendhang, terbang, reong, keluncing, suling lan baola.
Bagiyan penabuh ring karya iki yaiku ana sepuluh bagiyan. Siji yaiku kendhang hang ditabuh ambi Ryan Dwi Pamungkas lare Kepatihan Rogojampi mahasiswa teka Universitas Bakti Indonesia Banyuwangi, ana bagiyan Gong hang ditabuh Bagas Saputra lare Aliyan Rogojampi dadi guru ring SD Negeri 2 Gitik Rogojampi. Bagiyan reong ana loro hang nabuh yaiku ketuwane dhewek, Pungki lare teka Aliyan ambi Agung Mas Irawan lare teka Kepatihan Rogojampi Mahasiswa ring Politeknik Negeri Banyuwangi. Bagiyan Genthulitan ana telu hang nabuh yaiku Ari Prasetya lare Sraten dadi guru ring SDN 3 Sraten Cluring, Daffien Chandra lare Alasmalang Singojuruh uga Marvel Bintang lare Lemahbangkulon Singojuruh hang loro karone magih dadi siswa aktip ring SMAN 1 Rogojampi. Bagiyan baola lan nembang lontar dimandegani Alif Maulana teka Kepatihan Rogojampi hang saiki uga dadi guru ring SD Negeri 2 Gintangan Blimbingsari. Bagiyan nyanyi utawa sindhen ana loro yaiku Bellynda Wahyu Permatasari lare teka Satriyan Rogojampi staf ring RSUD Genteng ambi Inda Virda lare teka Alasmalang Singojuruh mahasiswa ring Politeknik Negeri Banyuwangi.
Acara LOKOVASIA 2024 iki ana pirangane babagan kang kawitan tahap intensifikasi hang wis mari dianakaken ring tanggal 13 sampek 19 Agustus 2024. Babagan kang pindho visitasi program hang uga wis mari dianakaken tanggal 20 sampek ring 29 Agustus 2024, kang pungkasan uga dadi puncake acara elaborasi lan ekshibisi program yaiku tanggal 1 sampek 8 September 2024 ring Universitas Negeri Malang, Jl. Semarang 5, Malang, Jawa Timur.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
