Literasi SMKN1 Banyuwangi lan Dongeng Basa Using

Antariksawan Jusuf (dipublikasikan pada Jumat, 22 November 2024 09:00 WIB)
- Laporan

Lalare murid SMKN 1 Banyuwangi dipenging ngersula kadhung nemoni alangan ring salah siji kegiyatan, merga lare-lare duwe talenta utawane bakat dhewek-dhewek.
   Iwuh hang diwani judhul Pribasasti (Program Integrasi Bahasa dan Literasi) iku minangka wujud nyata teka sekolah
nyokong anane gerakan literasi.
    "Makene bisa nyokong lalare dadi hebat kanggone awake dhewek-dhewek. Hang penter main musik makene hebat ring musik, semono uga hang duwe bakat ring literasi. Kene hing weruh mengarepe kelendi. Dadi kadhung hing pati bisa ring siji bidhang pelajaran aja ngersula. Goletana hang liyane," jare Ibu Polin Wakil Kepala Bidang Kesiswaan hang uga koordinator acara Pribasasti.
   Bu Polin nambahi lalare kudu nduwe sikap bisa kaya sepon hang nyesep inpormasi sak akeh-akehe. "Kosongena gelase makene bisa diiseni."
   Iwuh PRIBASASTI digelar kanggo ngunggahaken kemampuan literasi siswa kelawan ana pirangane kegiyatan. Yaiku Lomba Story Telling, Lomba Dongeng Basa Using, Lomba Pojok Literasi kelas (Majalah Dinding), Lomba Content Creator seputar Literasi, lan Talkshow Berkreasi Lewat Bahasa.
   Sekolahe ya nduweni wigati husus nang Literasi Using salah sijine nggelar Ndongeng Basa Using.
   "Isun sing isin nganggo basa Using. Rika kabeh mesthi kerep ngerungokaken Isun basa Usingan, yara? Merga paran? Merga Isun urip ring Banyuwangi," jare Bu Polin.
   Jare Pak Manik Wakil Bidang Kurikulum, kemampuan literasi lalare sekolah saiki, hing mung nong SMKN kene, rada mudhun.
Iwuh saiki iki salah sijine dienggo ngungkal kemampuan literasi lare-lare.
   SMKN 1 iki bengen arane SMEA Negeri, ngadeg taun 1968. Jaman semono buru ana telung jurusan: Akuntansi, Perkantoran, lan Pemasaran.
   Tepak ring acara Talkshowne, hang dipandu Devi lan Rafly, nekakaken Ketua Sengker Kuwung Belambangan Antariksawan lan Nur Kamila, MC lan tukang Voice-Over kesuwur hang cumpune alumni SMKN1 jurusan Pemasaran taun 1999.
    Siswa-siswine wis nduwe prestasi ring  literasi taun 2023-2024 iki, kayata:
1. Duta Literasi Jawa Timur
2. Duta Inisiatif Jawa Timur
3. Juara III Pidato Nasional
   Saiki arane dadi SMK Negeri 1 Banyuwangi, lan jurusane wis nambah dadi 10 yaiku:
1. Akuntansi dan Keuangan Lembaga
2. Manajemen Perkantoran
3. Bisnis Digital
4. Perhotelan
5. Desain Komunikasi Visual
6. Pengembangan Perangkat Lunak dan Game
7. Teknik Jaringan Komputer dan Telekomunikasi
8. Broadcasting dan Perfilman
9. Seni Pertunjukan/Seni Tari
10. Kuliner

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.