Lomba Cipta Seni Pelajar Taun 2023
Nani Asiany Mustikowati (dipublikasikan pada Sabtu, 02 Desember 2023 09:30 WIB)
- Laporan
Lomba-lomba nong acara Pekan Cipta Seni Pelajar (PCSP) SD Kabupaten Banyuwangi taun 2023 wis dibungkasi sakmarine kabeh juwara wis ditemokaken, kang ambi panitiya diweni tandha diterimakaken sertipikat juwara nyang para pemenang. Acara kang digelar dina Kemis, 30 Nopember 2023 kelaksan kelawan lancar. Mula panggonan lombane sing dadi siji sak panggonan taping ana kang dianakaken nong SDN Model lan ana kang nong pelinggihan Prabu Tawang Alun Disbudpar yaiku lomba musik tradhisi. Sedheng cabang seni liyane kaya tari, teater tradhisi, kosidah alternatif, paduan suara, cipta baca puisi, lan lukis dianakaken nong SDN Model.
Erpandi, minangka ketua panitiya sing nyangka kadhung lomba kang dadakan iki dipiloni emeh kabeh murid-murid SD sak kabupaten, makili kecamatane dhewek-dhewek. Pitung cabang kang dilombakaken dipiloni kabeh malah ana kang pesertane lebih teka separo. Kaya cabang lomba Cipta Baca Puisi, pesertane ana 23 siswa. Lukis ana 17 peserta. Kang ngagetaken lan sing dinyana-nyana kang milu lomba musik tradhisi. Pesertane ana 16 grup kang makili teka selawe kecamatan. Toraneya saben grup butuh wiyaga paling sithik sangang lare. Ndeleng gedigi, pertandha kadhung siswa-siswa SD ring Banyuwangi iki wis padha ana ekstra kurikuler nabuh gamelan hususe gamelan Banyuwangi. Rencana, ring taun ngarep para juwara ring kabeh cabang lomba iki arep dipilokaken nyang propinsi makili kabupaten Banyuwangi.
Ditambahaken ambi Sutikno, Kabid SD Dinas Pendidikan kabupaten Banyuwangi kadhung PSP iki dienggo sarana ngembangaken bakat, minat, lan kreativitas siswa. Kerana iku sekolah kudu tetep lan terus mbina bakat lan minate lare-lare iki. Acara PCSP taun 2023 kang dibuka Suratno, kepala dinas Pendidikan kabupaten Banyuwangi dihadiri sakliyane peserta lomba, uga dihadhiri guru-guru utawa pelatih cabang lomba kang dipiloni, para kepala SD kang ana ring wilayah kecamatan Banyuwangi, kecamatan Giri, lan kecamatan Glagah. Para pengawas SD sak kabupaten uga hadir milu ngeramekaken acara lomba iku.
Manggon ring kelas, peserta lomba cipta baca puisi melebu ring panggonan lomba dietutaken ambi guru lan pendhampinge. Biyasahe, nong lomba guritan iku lare dikongkon maca guritan (puisi) apik-apikan taping ring taun 2023 iki, sakliyane maca, peserta dikongkon nggawe guritane dhewek. Kadine lomba iki waktune dawa seru merga dikawiti nulis guritane sulung. Serta kabeh peserta wis tampil nggawakaken karyane aju diumumaken pemenang lomba iki. Kanggo lomba cipta baca puisi iki juwara siji keneng lare SDN Kepatihan kecamatan Banyuwangi, juwara loro keneng siswa teka Kalipuro, lan juwara telu dimenangaken lare Tegaldlimo. Sedheng cabang lomba liyane, kaya lomba teater tradisional, juwara siji keneng peserta teka kecamatan Siliragung aju disusul kecamatan Banyuwangi, aju teka kecamatan Glagah. Kanggo cabang musik tradhisi kang manggon ring pelinggihan Prabu Tawang Alun Disbudpar juwara siji dimenangaken ambi grup siswa-siswa teka kecamatan Muncar, aju disusul kecamatan Cluring, lan Blimbingsari juwara telu. Kecamatan Cluring dadi juwara siji nong lomba seni tari disusul teka kecamatan Rogojampi minangka juwara loro, lan disusul juwara telune teka kecamatan Banyuwangi. Kecamatan Tegaldlimo, Giri, lan Singojuruh juwara siji, loro, lan telu lomba qosidah, lan Lomba Paduan Suara, taun iki dimenangaken kecamatan Genteng, kecamatan Rogojampi, lan Banyuwangi.
Kaya ring pesene kepala dinas Pendidikan Kabupaten Banyuwangi nalika ngeresmekaken acara lomba PCSP taun 2023 iki, kegiyatan kaya gedigi supaya terus didhukung sekolah merga bisa nguwataken karakter siswa, karakter kang apik pasthine.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
