Lontar Yusup Digawa ring Dina Aksara Internasional Jakarta
Antariksawan Jusuf (dipublikasikan pada Sabtu, 27 September 2025 07:21 WIB)
- Laporan
Macaan Lontar Yusup Digawa ring Dina Aksara Internasional nang Jakarta
Taman Bacaan Masyarakat (TBM) Kampoeng Baca Taman Rimba (Batara) Papring Kalipuro, Banyuwangi milu ngeramekaken Hari Aksara Internasional (HAI) taun 2025 hang dianakaken ring Direktorat Pendidikan Nonformal dan Pendidikan Informal (PNFI) Kementrian Pendidikan Dasar dan Menengah (Kemdikdasmen) hang dianakaken ring Senayan Jakarta tanggal 25-27 September 2025.
Iwuh hang suwene telung dina iku dipiloni perwakilan Sanggar Kegiatan Belajar (SKB), Pusat Kegiatan Belajar Mengajar (PKBM), Taman Bacaan Masyarakat (TBM) lan pemerhati pendhidhikan hang latare kemasarakatan.
Kampoeng Batara dadi siji-sijine TBM sak Jawa Timur hang miloni kegiyatan iku.
Minangka delegasine, ana Widie Nurmahmudy lan Nur Kumala.
Sakliyane teka Jawa Timur, kegiyatan iku dipiloni pisan ring wakil-wakil teka Samarinda, Jawa Tengah, Jakarta lan Jawa Barat.
Noring Jakarta, Kampoeng Batara nampilaken Macaan Lontar Yusup minangka bagiyan teka pengetahuan manuskrip kuna kanggone generasi jaman saiki.
Ring Macaan Lontar Yusup iki, Nur Kumala macaaken petang pupuh sekaligus, Pupuh Kasmaran Kawit, Sinom Variasi, Pangkur lan Kasmaran Selobob.
Hing mung Macaan Lontar Yusup, ring acara iku Kampoeng Batara uga ngadiraken Nimas Cahyani Mustika hang njugedaken gandrung ring wayah Lontar Yusup diwacaaken.
Miturut Cecep Suryana, pejabat teka Direktorat Pendidikan Nonformal dan Pendidikan Informal (PNFI), Direktorat Jenderal Pendidikan Vokasi, Pendidikan Khusus dan Pendidikan Layanan Khusus (PKPLK), Kementrian Pendidikan Dasar dan Menengah (Kemendikdasmen), Macaan Lontar Yusup iki penting kanggo njaga teradhisi lisan supaya tetep lestari.
"Isun dhemen ring pirangane dhaerah teradhisi iki wis akeh hang ngembangaken, kelebu Macaan teka Banyuwangi," gedigu ujare.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
