Mari Hang Kawitan, Wayang Using Arep Pentas Maning Agustus
Antariksawan Jusuf (dipublikasikan pada Senin, 29 Juli 2024 07:30 WIB)
- Laporan
Kelendi rasane mari nggelar tontonan wayang Using ring Jakarta? Dhalang Ilham teka Songgon hing mari-mari ngucap sukur.
"Girang seru lan ngerasa iki minangka rasa hurmat merga Wayang Using dadi siji-sijine kesenian lokal dhaerah hang bisa munggah pentas ring Jakarta," jare Dhalang Ilham, hang nggawa 17 wong wiyaga lan sindhen teka Banyuwangi.
"Paran maning iki acarane Mas Gibran wapres terpilih, jare wong tuwek bengen kadhung wong cilik iku wis diundang ambi raja tandha-tandha arep ulih kamulyan. Isun ngarani Mas Gibran iki padha ambi raja, kadhung bengen raja, saiki pemerintah. Bedane kadhung raja iku mung siji kadhung saiki wong loro ana presiden lan wakile. Dadi Isun ngerasa terhurmat diundang ring acarane Mas Gibran," gedigu jare Dhalang Ilham.
Wayang Using Banyuwangi ditanggap ring Jakarta ngisi acara ring Rakernas Gibran Center ring Kemayoran. Wayang Using ulih jadwal munggah genjot tanggal 27 Juli. Setemene gelarane diangkati jam 21.00 cumpu mundur jam 22.00 lan pungkas emeh tengah dalu.
Hing kaya biyasahe, merga penjalukane panitiya, Wayang Using rada nyeliwah. Basane nganggo basa Indonesia tepak narasi cerita lan omong-omongan wayange.
"Taping suluk lan gendhing-gendhinge tetep nganggo basa Using."
"Penjalukane panitiya merga penontone ana nawi 1.000 wong teka wilayah sak Indonesia: Papua, Aceh, Kalimantan, Sumatra lan Sulawesi," jare Dhalang Ilham.
Nggawa cerita "Satriya Piningit Wayahe Metu", intine kelendi bareng-bareng nggendhong indhit kanggo apike Nusantara milu paran bisane lan kapasitase dhewek-dhewek.
Diceritakaken kanggo aduse Sang Satriya, kudu nggolet banyu teka pitung bucu panggonan ring Nusantara.
Ring gelaran iku, pirangane gendhing Banyuwangi digawa ambi papat sindhen, yaiku Gelang alit, Lara Sesigar, Dhonge Mekar lan Umbul-Umbul Belambangan.
Kayane panitiya ya girang ambi acarane, merga Wayang Using arep diundang maning ulan Agustus ring acara Silatnas (Silaturahmi Nasional) Gibran.
Hang disayangaken, wong diaspora Banyuwangi teka paguyuban Ikawangi Pusat hing patiya akeh hang ndeleng merga tanggale ketepakan kebarengan ambi acara ulang taun Ikawangi Tangerang Selatan hang acarane dianakaken ring Puncak Bogor.
Salah siji penonton Muhammad Darmin Ali teka Buton Sulawesi Tenggara, kaju mari ndeleng wayang Using. "Apik seru merga ngemu wawarah kanggo persatuan lan kesatuan bangsa," jare Ketua Partai Garuda. Hing kabeh wong partai hang teka ring acara iku, kira-kira mung setengahe, jare pak Darmin.
Wayang Using hing terima wayang nganggo basa Using, taping nganggo cerita-cerita hang pakem ceritane has Belambangan. Wayang Using pimpinane Dhalang Ilham wis nduwe pirangane pakem cerita, kayata Menak Jingga, Menak Sembuyu, Tawang Alun, Jagapati, lan Sayu Wiwit.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
