Masjid Kudu Dadi Pusere Kegiyatan

Antariksawan Jusuf (dipublikasikan pada Senin, 22 Mei 2023 09:25 WIB)
- Laporan



Ketua Pimpinan Daerah (PD) Dewan Masjid Indonesia (DMI) Kabupaten Banyuwangi H. Fathur Rahman ngengetaken gok saiki wayahe masjid dadi pusere kegiyatan hang ngewani manpaat lan bisa ngewani solusi kanggo kabeh masalah hang diadhepi masarakat. "Umpamane akses nang pendidikan, ekonomi lan kesehatan," jare H. Fathur.
   Wekase iku disampekaken tepak iwuh  Halal Bi Halal 1444 H hang dianakaken ring Pendopo ar-Rahman, Kelurahan Sobo, Kecamatan Banyuwangi dina Sabtu, 20 Mei 2023.
   Paran maning kelawan majune teknologi informasi (IT) kudune bisa dienggo manpaat kanggo wong akeh. Umpamane kanggo administrasi utawa iwuh liya hang kudu disokong nganggo teknologi digital.
   Saiki wis hing jamane nganteni surat hang dicetak, surat elektronik minangka jawaban kanggo nggancangaken lan nggawe organisasi saya efisien, jare H. Fathur.
   Sing mung ngewani laporan kegiyatan, H. Fathur uga nganakaken iwuh Turba ring saben-saben ketua Pimpinan Cabang yaiku pengurus DMI ring tingkat kecamatan sak Kabupaten Banyuwangi.
Turba hang saiki iki ulih sangu penemu lan laporan wadul langsung teka pengurus lan anggota.
   Teka kene dadi rekomendasi kanggo program kerja hang saya jelas lan seterategis kanggone mbecikaken programe pengurus.
   Kepala Kantor Kementrian Agama Kabupaten Banyuwangi Moh. Amak Burhanudin njaluk kabeh pengurus DMI supaya saya nambah sinergine. Merga iki dadi sarate sedurunge pengurus dadi pelopor kanggo njaga kahanan kondhusip ring masarakat.
   Utamane kanggo njaga makene masarakat dadi rukun lan kompak. Mesthine kene hing kira ngetokaken rekomendhasi kanggo ngadege panggon ibadah, utamane masjid, kadhung magih ana hang bentheng ceweng, jare Amak Burhanudin.
   Sing gelem kalah,  Pelaksana Tugas (Plt) Kepala Badan Kesatuan Bangsa dan Politik (Bakesbangpol) Muhamad Lutfi ngomong gok Pemkab ulih penghargaan ring tingkat nasional teka Kementrian Dalam Negeri. Pemkab Banyuwangi wis asil nggayuh perestasi kategori Pemerintah Daerah Berkinerja Tinggi se-Indonesia.
   Perestasi iku hing luput teka sokongane masarakat ring ngingsor utamane pembangunan masarakat liwat masjid-masjid hang ana.

(Mohamad Soleh Kurniawan)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor