Maulid Semakapura Nekakaken Buyute Kiyai Saleh Lateng
Antariksawan Jusuf (dipublikasikan pada Sabtu, 28 September 2024 07:40 WIB)
- Laporan
Maulid Semakapura Nekakaken Mubalig Buyute Kyai Saleh Lateng
Jodhang endhog-endhogan diarak kelawan diiringi deramben dadi penandha mengeti Maulid Nabi Muhammad SAW ring SMKN Kalipuro, Banyuwangi dina Kemis 26 September kepungkur hang dibukak ring Lurah Kalipuro Bonari.
Kepala SMKN 1 Kalipuro Sulihah, M.Pd liwat Wakasek Kehumasan Sri Susilowati, S.Pd nyampekaken gok murid-murid diwani kesempatan kanggone ngerengga kereyasi jodhang miturut karakter lan pisolopine. Dikarepaken ana siji Korsa Kelautan kanggo mujudaken wujud Kapal Phinisi lan ombak hang obah uga rasa sukur ring wujud tumpeng.
"Isun mongkog merga ana kelas hang muride maneka macem agamane bisa tepa selira lan gotong royong, hang artine semangat Pancasila bisa kewujud," ujare Bu Sulistyowati, S.Pd. hang uga dadi juri ring Lomba Jodhang. Iyane iki ring kampus Surabaya kapanane nggayuh Sertifikat Profesi Kelautan.
Ketua panitiya Drs. H. Mohammad Shodiqin, M.Pd. hang didhampingi guru P3K H. Wawuh uga Pengurus Komite Bu Erna lan Pak Mansyur nyampekaken gok iyane ngerasa girang ndeleng semangat lan sumringahe kabeh taruna mengeti lan maknani Maulid Nabi kelawan pengarepan mbesuk ring yaumil kiyamat bisa nggayuh syapaat Rasulullah kelawan ridane Pengeran.
Puisi karyane ketua panitiya hang uga pengurus PC PERGUNU lan Kosgoro MASTRIP iki ditampilaken kelawan apik ring Maysaroh Putri Maulidah, alumni SMPN 1 Situbondo lan Cleo Heaven Valisma alumni SMP Eka Tjipta Tangar ring Borneo.
Peringatan Maulid Nabi Muhammad SAW hang nduweni tema 'Momentum untuk Refleksi dan Perbaikan Diri Ikuti Tauladan Rasulullah' iki nekakaken buyute Kyai Saleh Lateng, Ustadz Rachman Zainuddin, SHI. Iyane nyampekaken gok masarakat Banyuwangi kudu mongkog merga anane Salawat Badar hang diciptakaken nyang KH. Ali Mansur hang tau dadi kepala Kemenag Banyuwangi. Mongkog gok GP Ansor dilairaken ring Banyuwangi, uga anane tokoh Ulama gedhi ring bumi Belambangan. Seliyane iku uga ana putra terbaik hang dadi menteri kayata Moerdiono, Arief Yahya lan Azwar Anas. "Mung aja mongkog merga Banyuwangi kecathet dadi nomer papat ring dhuwure angka kasus wong pegatan ring Indonesia," ucape modin pengulu KUA iki.
Kang Mamang-celukan akrabe buyute Kyai Saleh iki wekas gok kanggone nggayuh sukses kudu akeh salawat uga bekti lan sopan nyang wong tuwek lan urmat nyang guru lan TU kanggone berkahe ilmu. "Jejegaken sembayang limang wektu!" Ujare kelawan salawatan lan nggandhangaken lagu Keramat Rhoma Irama.
Sawetara iku KTU Semakapura Bogi Ananda, S.Ap. nyampekaken ana jurusan hang nyukupi pagu muride yaiku Kapal Niaga Nautika Navigasi lan Teknik. Sedheng jurusan Pengelasan, Boga Hotel Kapal Pesiar lan jurusan Listrik Pendingin kaya kurang peminate, ale kesempatan kerjane magih gedhi. "Mayo Kita bareng-bareng promosi ndhukung kadher negara maritim lan masarakat cerdhas merga dhemen mangan olahan asil laut."
(Aguk/AfM/JN)
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
