Mengeti 90 taun Dina Dadine Pak Djuri, Wong Lemahbang ring Bandung
Antariksawan Jusuf (dipublikasikan pada Selasa, 22 Agustus 2023 09:12 WIB)
- Laporan
Salah siji wong Ikawangi hang paling tuwek, magih seger, H. Djuri sorene maning (20/8) nduwe iwuh kanggo mengeti dina dadine hang kaping 90 taun ring umahe Bandung.
Ketua Ikawangi Pusat Mayjen Purn. Pak Rusdi Maksum ngucap terima nyang Pak. Djuri merga wis mbina Ikawangi Bandung. Malah wis sakat bengen mbantu lalare Banyuwangi hang kuliyah ring Bandung. "Isun dhewek ngerasakaken kenikmatan anane Kang Djuri merga adhikisun ruwahe Munif taun 1964, kuliyah ring Bandung. Kadhung hing ana Kang Djuri, "mati" wis. Yaiku, adhikisun wis melaku sulungan, iki Kang Djuri magih tahes. Sakliyane Kang Djuri, tepak iku ana pamanisun yaiku Prof. Suyono," jare Pak Rusdi hang teka ring iwuh iku dikancani rabine lan salah siji pendiri Ikawangi Pak H. Sutardjianto lan rabine pisan.
Nawi Pak Djuri sinau teka pengalamane dhewek. Jare Bu Muhayah rabine, taun 1957 melebu ITB iku keleleran masa ana hang dijujug. Paran maning wong tuwek hing ngarti paran-paran, daptar sekolah golet-golet dhewek. Sedurunge taun 1960 durung ana SMA ring Banyuwangi, dadi Pak Djuri kudu sekolah SMA nong Malang.
Jare Pak Rusdi hang maca riwayat uripe, "Iku Kang Djuri dadi pegawai taun 1962 lan pensiun 1995. Kang Djuri iki langka. kelairan taun 1933 seperene magih urip, wis ngalami sesuatu hang istimewa, mulai telp hang diputer-puter saiki kari ndulek."
Jare Pak Rusdi, paran maning ring Banyuwangi magih repot, kadhung selamet seperene bain wis alhamdulillah. Kuliyah ring ITB, nang Jerman, Jepang, umahe ring kene sampek duwe hotel.
Pak Djuri anake enem, lima lanang siji wadon, wis ngewani putu 10. Pak Djuri bengen ring Lemahbang kerep milu main Janger sampek diundang ring desa liya. Getih senine nurun nyang anake hang aran Edi Kemot, saiki dadi tukang tabuh drum grup band Seringai.
"Teka bain hing bisa bareng.Tapi saiki masiya adoh bisa nganggo HP, bisa kumpul."
Pak Djuri masiya senior seru, nyedulur nang kanca-kancane rabine hang umurane beda 11 taun. Bu Muhayah iku angkatan loro SMA ring Banyuwangi kancane Pak Rusdi, dokter Bakarman. Kabeh dianggep dulur kelebu Pak Tarji, Pak Abdul Hamid lan Pak Noer Hafandi lan ruwahe Pak Abdul Kahfi hang dadi angkatan kepisan SMA Banyuwangi.
Pak Djuri hang nduwe prinsip jujur, temen, priatin minangka resep sukses uripe, uga hing melid nyekolahaken dulur-dulure. Kabeh lima ipene (dulure Bu Muhayah) ditarik disekolahaken ring Bandung. Ponakane Pak Djuri ya dikuliahaken ring Bandung.
Pak Djuri milu Survey lapangan pemetaan geologi sak Indonesia sakat taun 1962, Indonesia magih sara seru. Hing kaya saiki, ceritane nong lapangan hang serem, hang bahaya, kadung nong lapangan masa kaya saiki turu ring hotel, bengen turu ring hutan pinggir banyu, paling mewah turu ring pak Lurah. Iyane uga ngasilaken Peta Geologi hang dienggo bahan kuliyah lan Pelajaran mahasiswa ITB. Sekolahe sakat jaman penjajahan sekolah Taman siswa sampek ngalami tau hing ana pemerintahan.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
