Metani Iwuh Anugerah Musik Banyuwangi 2024

Moch Anil Syidqi (dipublikasikan pada Senin, 02 September 2024 07:26 WIB)
- Laporan

Ring dina Sabtu (31 Agustus 2024) dalu, Pemerintah Kabupaten Banyuwangi duwe gawe. Iwuh hang diuweni aran Anugerah Musik Banyuwangi yaiku wadhah kanggo ngupahi daya rekasane para seniman gendhingan utawa musisi Banyuwangi.

Merga digelar ring Banyuwangi, acara bengi iku hang ndeleng ambyak-ambyakan.

 tumpek-blek nong Gesibu, Komplek Taman Blambangan, Banyuwangi.

Sakdurunge melebu nong inti acara, ana suguhan teka para juwara lomba Gendhing Using 2024 minangka bagiyan teka kegiyatan Anugerah Musik Banyuwangi 2024 kategori anak lan remaja hang wis beres dilakoni uga Ochi Alvira (penyanyi hang arane magih anget-angete, paling sing, ring sak ubenge masarakat Banyuwangi lan aplikasi YouTube). 

Ring gerombolan lalare cilik, ana:

1. Azhka Nathan Prayogo hang nggawa lagu Emak Kuwalon gawenane Tuki Efendi

2. Ambril Bima kelawan lagu Gapangan gawenane BS Noerdian

3. Inggrid Putri Ramadhani kelawan lagu Kangen Banyuwangi gawenane Rudi Joss

4. Rashieka Neva Graciela kelawan lagu Lukluk Lumbu teka Andang Chotif

Kadhung ring gerombolane lalare lancing lan perawan tanggung, ana:

1. Adellia Tasya nggawakaken lagu Warang teka Ion Mas

2. Pandi kelawan lagu Tau Dadi Cerito (kudune ditulis ‘cerita’) gawenane Alfred R. lan Exzel

3. Sakinah, lagu Damar Langit teka Agung S.

4. Arvin, lagu Kelangan teka Ali PX

5. Salma kelawan lagu Mawar Ilang teka Adi Netral

6. Delon kelawan Aji Pulut Nongko gawenane Lek Wang

7. Norin, Nggudo (kudune ditulis ‘nggudha’) Ati gawenane Demy Yoker

8. Herlan, kelawan lagu Percumo (kudune ditulis ‘percuma’) teka Prima HP

Salah sewijine penyanyi hang tampil sakdurunge inti acara, ana Ochi Alvira; ditabuhi ambi grup orkes Onechestra duwene penyanyi lan tukang olah gendhing orkes, Wandra. 

Ring penampilan iki, Ochi nembang rong lagu. Kawitan, nggawa lagu Ngelabur Langit gawenane Koming. Pungkasan, yaiku lagu Layang Suworo (kudune ditulis ‘suwara’).

Hang nyegeraken rasa, yaiku suguhan jugedan kelawan gendhing digital (naming magih ana rasa tradhisonal Banyuwangine) teka para juwara lomba Gendhing Using 2024. 

Para juwara lomba Gendhing Using 2024, hang ring antarane sakdurunge wis nembang dhewek-dhewek, tampil bareng, nggawe tatanan jugedan lan nembang bareng.

Lagune gawenan anyar; nduwe karep nggugah semangate lalare Using liwat sair lan rasa gendhinge. Gendhinge hang rancak, nggawe lalare hang nembang njuged ngerasakaken sampek kegawa nyang blegere tempo (alon-gancange gendhing). 

Isi sair-saire ring antarane yaiku arupa ngajak lalare Banyuwangi kanggo mbangun tanah kelairan, uga ndadekaken seni lan budaya minangka cekelan ring uripe.

Hang ketulis ning kalimah sair iki:

Wis wayahe mbangun tanah kelahiran, seni budaya hang dadi cekelan

Sak liyane iku, uga nyeritakaken rakete lalare enom Banyuwangi. Hang ketulis ning kalimah sair iki:

Isun lan rika selawase bebarengan seduluran

Kiwa tengen padha guyub geguyonan

Rika lan isun padha kanca aja sampek hing sapaan

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.